Shpekbaev pen «Ádildik joly» birlestigi keńesiniń tóraǵasy Saljanov yntymaqtastyq memorandýmyna qol qoıdy ǵa qol qoıdy

NUR-SULTAN. QazAqparat - Búgin Sybaılas jemqorlyqqa qarsy is-qımyl agenttiginiń alańynda Alık Shpekbaev pen «Ádildik joly» respýblıkalyq qoǵamdyq birlestigi keńesiniń tóraǵasy Islambek Saljanov memorandýmǵa qol qoıdy, dep habarlaıdy QazAqparat atalmysh vedomstvonyń basapsóz qyzmetine silteme jasap.

Yntymaqtastyqtyń maqsaty – sybaılas jemqorlyqqa qarsy is-qımyl boıynsha qabyldanatyn sharalardyń tıimdiligin arttyrý, sybaılas jemqorlyq quqyq buzýshylyqtar jasaýǵa yqpal etetin sebepter men jaǵdaılardy joıýǵa baǵyttalǵan is-qımyldardy ázirleý jáne iske asyrý.

A.Shpekbaev atap ótkendeı, «sybaılas jemqorlyqqa qarsy qyzmetke qoǵamdy keńinen tartý el basshylyǵy men Agenttiktiń negizgi basymdyǵy bolyp otyr.

Bul – azamattardyń talaptaryna jáne jalpy qabyldanǵan halyqaralyq standarttarǵa jaýap beretin qazirgi zamanǵy sybaılas jemqorlyqqa qarsy saıasattyń negizgi alǵysharty. Jemqorlyq – indet, ony joıý bárimizge ortaq mindet».

Sybaılas jemqorlyqqa qarsy qyzmet búginde azamattyq qoǵammen syndarly áriptestiktiń úzdik tájirıbesin kórsetip otyr. Buǵan «Adaldyq alańy», arnaıy monıtorıngtik toptar, aqparattyq-aǵartýshylyq shtabtar, «Adal kómek» jobasy men jastardyń sybaılas jemqorlyqqa qarsy qozǵalystary sııaqty sybaılas jemqorlyqqa qarsy jobalarǵa tartylǵan 100 myńǵa jýyq qoǵam ókilderi – eriktilerdiń qoldaýy dálel boldy.

Óz kezeginde Islambek Saljanov: «Sybaılas jemqorlyq bizdiń moraldyq negizderimizge keri áserin tıgizip, áleýmettik ádilettiligimizge nuqsan keltiretin jáne elimizdiń áleýmettik-ekonomıkalyq damýyn tejeıtin qoǵam derti. Álemdik tájirıbe kórsetip otyrǵandaı, sybaılas jemqorlyqpen kúresýdiń negizi sybaılas jemqorlyq oryn alyp jatqan oqıǵalarǵa azamattardyń salǵyrt qaramaýynda», – dedi.

Sondaı-aq, ol sybaılas jemqorlyqty joıý jolynda ár qazaqstandyqtyń qosqan úlesiniń mańyzdylyǵyn atap ótti.