Shpekbaev: Bıznestiń damýyndaǵy tosqaýyldardyń biri - jemqorlyq
«Kásipkerliksiz kez kelgen memlekettiń damýy múmkin bolmaıtyny anyq. Sondyqtan Qazaqstanda kásipkerlikti damytý úshin bıznes-klımatty jaqsartý, ruqsat berý júıesin jetildirý, memlekettik baqylaý-qadaǵalaý qyzmetin ońtaılandyrý rásimderin ońaılatý boıynsha túbegeıli sharalar qabyldanýda. Elbasy kásipkerlik salasyna erekshe nazar aýdaryp, ony elimizdiń odan ári damýynyń basym baǵyttarynyń qataryna engizýdi jalǵastyrýda», - dedi agenttik basshysy Sybaılas jemqorlyqqa qarsy is-qımyl máseleleri jónindegi ekinshi respýblıkalyq kásipkerler forýmy barysynda.
Onyń atap ótýinshe, atalǵan maqsatta 2017 jylǵy 27 qarashada Prezıdent bıznes júrgizýdiń ońaılyǵy boıynsha óńirler men qalalardyń reıtıngin qurý jáne onyń nátıjesi boıynsha arnaıy syılyqpen marapattaý týraly Jarlyqqa qol qoıdy. Sonymen qatar, Elbasy óziniń bıylǵy Joldaýynda bıznes-ortanyń damýyn túbegeıli jaqsartýdy jáne keńeıtýdi tapsyrdy.
«Halyqaralyq tájirıbe kórsetkendeı, bıznestiń damýyndaǵy tosqaýyldardyń biri - sybaılas jemqorlyq. Osyǵan baılanysty kásipkerlikti damytý men sybaılas jemqorlyqtyń aldyn alýdaǵy mindetter bir-birimen tyǵyz baılanysty dep aıtýǵa bolady. Týra úsh jyl buryn biz Sybaılas jemqorlyqqa qarsy strategııany qabyldap, onyń sheńberinde sybaılas jemqorlyqqa qarsy is-qımyl salasyndaǵy zańnamany tolyqtaı qaıta qarastyrdyq. Bul qoǵamnyń barlyq deńgeıimen, sonyń ishinde bıznes sýbektilerimen baılanysty qalyptastyrýǵa múmkindik berdi. 1-shi Kásipkerler forýmynyń qorytyndylary oń nátıjelerin berýde. Atalǵan format dástúrli bolatynyna jáne búgingi forýmdy ótkizý bıznes salasynda sybaılas jemqorlyqqa qarsy jańa bastamalarǵa bastaý bolatynyna senimim mol», - dedi Alık Shpekbaev.