Іship júrgen asymyz sapaly ma – zerthana ortalyǵynan reportaj
ASTANA. KAZINFORM – Elordada sý, aýa, topyraq, tamaq ónimderi men halyq tutynatyn taýarlarǵa sanıtarlyq zertteýler júrgizetin ortalyq bar. Maqsat – halyq tutynatyn ónimder men azyq-túliktiń sapasyn tekserip, tıisti baǵa berý. Osy oraıda Kazinform agenttiginiń tilshisi Qazaqstan Respýblıkasy Prezıdenti Іs Basqarmasynyń Medıtsınalyq ortalyǵynyń sanıtarlyq-epıdemıologııalyq saraptama ortalyǵynyń dırektory Sáýle Sháripova aıtyp berdi.
«Bizdiń mamandar joǵary tehnologııalyq jabdyqtyń kómegimen adam densaýlyǵyna keri áser etýi múmkin qaýipti elementterdi anyqtaıdy. Zertteýler arqyly qorshaǵan ortany turaqty organıkalyq jáne adam densaýlyǵyn lastaıtyn ýly elementter men dıoksınderdi tabamyz. Bul kóbinese janýarlardan alynatyn ónimdermen baılanysty», – dedi Sáýle Sháripova.
Ortalyq basshysynyń aıtýynsha, ortalyqtyń zertteýleri elementterdiń sapasy men sanynyń naqty kórsetkishterin anyqtaýǵa baǵyttalǵan. Sebebi taǵamda tuz ben qanttyń artyq nemese kem bolýy, sondaı-aq, maı mólsheriniń shamadan tys bolýy júrek-qan tamyrlary aýrýlarynyń, semizdik pen qant dıabeti taǵy basqa derttiń qaýpin arttyrady.
«Sońǵy ýaqytta bizdiń mamandar muzdatylǵan taǵamdardaǵy ylǵaldylyqtyń joǵarylaýyn anyqtap jatyr. Bul densaýlyqqa qaýipti emes, biraq tutynýshy ónimdegi aqýyz, maı jáne kómirsýdyń ornyna qur sýdy satyp alady. Odan bólek, sanıtarlyq-epıdemıologııalyq saraptama ortalyǵynyń mamandary synamalar arqyly ónimniń qaptamada kórsetilgen kórsetkishterge salystyrmaly taldaý jasaıdy», – dep atap ótti sanıtarlyq-epıdemıologııalyq saraptama ortalyǵynyń basshysy.
Sondaı-aq, ortalyq mamandary keń aýqymdy zertteý júrgizýiniń arqasynda halyq densaýlyǵyn saqtaýda mańyzdy ról atqaryp otyrǵanyn aıtady.
Aıtpaqshy, atalǵan ortalyqta otandyq naryqta paıdaly jáne durys taýar jasaýǵa kómektesý úshin bıznes ókilderine arnalǵan sanıtarııalyq-epıdemıologııalyq salaýattylyqty qamtamasyz etý boıynsha turaqty negizde sheberlik synyptary ótkiziledi.
