Shoýmen Nurtas Adambaevtyń basy bálege qaldy
ASTANA. 2 mamyr. QazAqparat - Qazaqty mazaqqa aınaldyryp, sonysynan nápaqa aıyryp júrgen «Nasha KZasha» oıyn-saýyq baǵdarlamasynyń ártisi Nurtas Adambaevtyń basy bálege qaldy.
Adambaev osydan 5 jyl buryn kóligimen adam qaǵyp, endi ózi jarymjan qylǵan jigitke járdemdesýden qashyp júrgen kórinedi.
«Jas qazaq» gazetiniń (№16 (380) sany) jazýynsha, shoýmen Adambaevtyń kóliginiń astynda qalyp, kóz janarynan aıyrylǵan almatylyq Maqsat Qýandyqov 400 mln. teńge ótemaqy talap etken. Qýandyqov ol kezde nebary 22 jasta bolǵan. Adambaev odan keshirim surap: «emdeý aqysyn túgel tólep berem» dep, kelisken kórinedi. Alaıda, jarymjan jigittiń ata-anasynyń sózine qaraǵanda, shoýmen olardy qur sózben aldap, ýaqytty sozyp kelipti. Basqa amaldary qalmaǵan Qýandyqovtardyń otbasy endi ótemaqyny sot arqyly óndirýge bel býǵan.
Oqıǵa bylaı bolǵan...
2007 jyldyń naýryz aıynda Abaı men Fýrmanov kósheleriniń qıylysyndaǵy jaıaý júrginshilerge arnalǵan jolmen ótip bara jatyp súrinip qulaǵan Maqsatty joldan burylmaq bolǵan Nurtastyń temir kóligi qaǵyp ketedi. Adambaev ájýalap júretin jol polıtseıleri oqıǵanyń ústinen túspegen sııaqty. Sóıtip, ol kezde oqıǵaǵa baılanysty qylmystyq is qozǵamaı, eki jaq ózara kelisimge kelipti. Kelisim boıynsha eks-KVN juldyzy Qýandyqovty emdetpek bolady. Sóıtip onyń sózine sengen Maqsattyń ata-anasy aryzdaryn qaıtyp alǵan. Alaıda Adambaev sodan keıin boıyn aýlaqqa salyp, Qýandyqovtarmen shekarasyn múlde úzgen.
Jábirlenýshi jigittiń ákesi Muratbek Qýandyqov: «Adambaevtyń aıtyp júrgen sózi - Maqsatty birneshe qalaǵa, tipti shetelge aparyp emdetpek bolǵanynyń bári ótirik», deıdi.
Maqsattyń kóz janaryn qalpyna keltirý týraly eshbir dáriger kepildik bermegen. Onyń ústine emge kóp qarjy ketedi. Máselen, Izraılde 62 myń dollar, Reseıdede sol shamadaǵy aqy suraǵan. Bes jyldan beri sýqarańǵy tirshilik keshken jarymjan jigit bıyl 27 jasqa tolypty. Al ony qara joldyń boıynda qap-qarańǵy tirshiliktiń qapasyna tyqqan Nurtas Adambaev qazir Taılandta telefılm túsirip júrgen kórinedi.
Al «Vremıa» gazetine suhbat bergen «Nasha KZasha» baǵdarlamasynyń burynǵy ártisi Nurtas Adambaev bylaı dep aqtalady: «Men Maqsat Qýandyqovtyń ne úshin mashınamnyń astyna túskenin túsinbeımin. Biraq oqıǵa bolǵan kezde týystarymmen birge onyń qasynda boldyq. Emdettik, dári-dármegin alyp berdik. Tipti únemi aqsha da berip turdym. Búginge deıin jalpy qansha aqsha bergenimdi bilmeımin. Reseıge de emdetkim kelgen, biraq jolǵa bılet alyp qoıǵan kezde olar ózderi bas tartty. «Izraılge emdelem, 220 myń dollar taýyp ber» dedi. Mende ondaı aqsha qaıdan bolsyn? Biraq báribir Qýandyqovtardyń otbasy aldynda meniń arym taza!».
Qazaqty mazaq qylýdyń qısyny
Jurt Nurtas Adambaevty «Nasha KZasha» arqyly tanıdy. Alaıda onyń óz ultyn, salt-dástúrin, tilin mazaq qylatyn, biraq sonysyna arlanbaıtyn minezin túsine almaıdy. Adambaev óz ulty týraly ne aıtpady? KTK telearnasy arqyly qalyń qarakózdiń saltyn saıtanǵa teńedi, alaman aıtysyn ájýalady. Múmkin onyń osy satırasy bireýlerge qajet bolar, múmkin qazaqty mazaq qylǵan jigitterdi qoldaıtyn bireýler bar shyǵar. Nege ekenin kim bilsin, KTK ekrany arqyly «Nasha KZasha» aıylyn Altaı men Atyraýdyń arasyndaǵy Alash balasynan jımaı-aq qoıdy. Ájýalady, kemsitti.
Aıta keteıik, Forbes jýrnaly qazaq ánshileri men shoý-bıznes ókilderiniń arasynda byltyrǵy jyldyń eń tabysty adamdaryn anyqtaǵan bolatyn. «Nasha KZasha»-nyń jigitteri shoý-bıznestegi «tabysty jetiliktiń» 3-orynyna taban tirepti.
