Shotynan 70 mln teńge joǵalǵan PIK-tiń burynǵy basshysy qamaýǵa alyndy

ALMATY. QazAqparat- Almatyda «Premera» turǵyn úı keshenin basqarǵan páter ıeleri kooperatıviniń burynǵy tóraǵasy qamaýǵa alyndy, dep habarlaıdy QazAqparat tilshisi.

Naýryzbaı aýdanynyń prokýratýrasy birneshe jyldan beri turǵyn úı keshenin basqarýǵa qatysty máseleler turǵyndar arasynda narazylyq pen kelispeýshilik týdyrǵanyn habarlady.

Azamattardyń ótinishteri men basqa da materıaldarǵa júrgizilgen taldaý nátıjelerimen sotqa deıingi tergep-tekserýdi bastaý úshin jetkilikti negizder bar ekendigi anyqtaldy.
Saraptama qorytyndysy boıynsha páter ıeleri kooperatıviniń esepshotynda 70 mıllıon teńgeden astam qarajat jetispeıtini anyqtaldy. Turǵyndar nysandy kútip ustaý boıynsha qyzmetter úshin tólegen, biraq qarjy qalanyń kommýnaldyq qyzmetterine túspegen.

«Osyny eskere otyryp, aýdan prokýratýrasymen PIK-tiń burynǵy tóraǵasyn kúdikti dep taný týraly sheshim kelisildi, QR QK-niń 189-baby 4-bóligi 2-tarmaǵy (ıaǵnı asa iri mólsherde jasalǵan bótenniń múlkin urlaý) boıynsha onyń áreketteriniń biliktiligi anyqtaldy. Sondaı-aq prokýratýra jasalǵan qylmystyń aýyrlyǵyn eskere otyryp, tergeý organnyń burynǵy PIK tóraǵasyn qamaýǵa alý qajettiligi týraly ótinishin qoldady, ol keıinnen sottyń sanktsııasymen qamaýǵa alyndy. Qazirgi ýaqytta tergeý jalǵasyp jatyr. Tergeý aıaqtalǵannan keıin qylmystyq isti qaraý jáne túpkilikti úkim shyǵarýǵa sotqa jiberiledi», - dep habarlady prokýratýradan.

Prokýratýranyń qabyldaǵan sharalarymen kommýnaldyq qyzmetter aldyndaǵy bereshekterine qaramastan, osy turǵyn úı kesheni elektr – jylýmen jabdyqtaýdan ajyratýǵa jol berilgen joq.

Buǵan deıin «Premera» turǵyn úı kesheniniń turǵyndary jaryqty óshirgeni úshin joldy jaýyp tastaǵan bolatyn.