Shotlandııalyq velosıpedpen 79 kúnde álemdi aınalyp shyqty
ASTANA. QazAqparat - Shotlandııa turǵyny Mark Bomont Jer sharyn velosıpedpen 79 kúnde aınalyp shyǵyp, álem rekordyn ornatty.
Bı-Bı-Sıdiń habarlaýynsha, asa tózimdiliktiń 34 jastaǵy áýesqoıy 18 qyrkúıekte Parıjde márege jetken.
Bomont 2 shilde kúni dál osy Frantsııa astanasynan saparǵa shyqqan bolatyn. Osy kezeńde velosıpedshi 16 eldi basyp ótip, 29 myń kılometr jol júrgen. Táýligine shamamen 370 kılometrden 16 saǵat boıy toqtamaı júrip, uıqyǵa bes saǵat bólip otyrǵan.
Bomont betke alǵan marshrýty boıynsha Reseı men Mońǵolııany artqa tastap, Qytaı astanasyna deıin barǵan. Ol jerden Avstralııaǵa ushaqpen jetip, jasyl qurlyqtyń batysynan shyǵysyna deıin qıyp ótip, Jańa Zelandııadan da ótken. Ol jerden AQSh-qa deıin ushaqpen ushqan Mark Soltústik Amerıka qurlyǵyn da batysynan shyǵysyna qaraı: Alıaskanyń Ankorıdjinen bastap Kanadanyń Jańa Shotlandııa provıntsııasyndaǵy Galıfaks qalasyna deıin júrip ótken. Odan soń velosıpedshi Portýgalııaǵa ushyp baryp, ońtústik-batys Pıreneı elinen Parıjge deıin taǵy da pedal aınaldyrǵan.
Bomont buryn tirkelgen álemdik kórsetkishti 44 kúnge qysqartty. 2008 jyly taǵy bir shotlandııalyq Jer sharyn velosıpedpen 194 kúnde aınalyp ótip, keıinnen onyń nátıjesi 123 kúnge deıin qysqarǵan bolatyn.
Budan tys, Gınnestiń rekordtar kitabyndaǵy taǵy bir rekord jańartyldy. Ol saıahatynyń alǵashqy aıynda Parıjden Avstralııanyń Pert qalasyna deıin 11 myń 315 kılometr júrip ótken.
