Shotlandııalyq jas jubaılar Kóshpendiler oıynyna bal aıyn ótkizýge keldi

ASTANA. KAZINFORM – Shotlandııadan kelgen erli-zaıypty Sılke Maes pen Kıeran Shennon nekesin toılaýdyń erekshe ádisin tańdady. Saıahatshy jas jubaılar bal aıyn Astanada Dúnıejúzilik kóshpendiler oıyndarynda ótkizýdi uıǵarǵan.

Erli-zaıyptylar Qazaqstanǵa 10 kún buryn kelgen, bul olardyń Ortalyq Azııaǵa alǵashqy sapary.

«Biz Astanaǵa Shotlandııadan ushyp keldik. Biz Qazaqstanǵa bılet brondaǵanda Kóshpendiler oıyndary týraly bildik jáne rasymen de barýymyz kerek dep oıladyq. Buǵan deıin Kóshpendiler oıyndary týraly estigen emespiz, - deıdi Sılke Maıes.

Sılke men Kıeran Astana mańyndaǵy Býrabaıǵa baryp úlgerdi.

«Shynymdy aıtsam, bul saparǵa deıin Qazaqstan týraly eshteńe bilmedim. Munda Astana sııaqty qalalar emes, dala kóp bolady dep oıladym. Biz adamdarǵa, sáýlet ónerine, tabıǵatqa jáne Qazaqstandaǵy barlyq nársege tań qaldyq», - deıdi olar.

Jýrnalıstik akkredıtatsııa arqyly erli-zaıyptylar barlyq jarystardy tamashalaýǵa múmkindik alǵan.

«Kóshpendilerdiń oıyndary meni qatty tań qaldyrdy. Men ne kútetinimdi bilmedim. Myńdaǵan jyldar boıy damyp kele jatqan dástúrli oıyndardy kórý men seziný óte ǵajap. Bizde Eýropada mundaı eshteńe joq, sondyqtan ony Qazaqstanda sezingenimizge qýanyshtymyz», - dedi Kıeran Shennon.

Endi sheteldik qonaqtar qazaq dástúrleri týraly kóbirek bilýge qyzyǵýshylyq tanytýda. Olar vegetarıan bolǵandyqtan, ulttyq et taǵamdaryn jeı almaǵan. Áıtse de, qurt pen jentti erekshe unatqan.

Sılke men Kıeran 3 jyldan beri saıahattap keledi jáne taǵy 7 jyl boıy shytyrman oqıǵalaryn jalǵastyrýdy josparlap otyr.

Olar kelesi birneshe aıdy Qyrǵyzstanda, Ózbekstanda jáne Túrikmenstanda ótkizýge nıetti. Odan keıin erli-zaıyptylar Qytaıǵa barady.