Shotlandııada týrıster selfı jasaý úshin 500 jyldyq tarıhy bar qamaldyń qabyrǵasyn buzǵan

ASTANA. KAZINFORM — Shotlandııada týrıster 500 jyl boıy turǵan Ardvrek qamalynyń qabyrǵasyn zaqymdady, dep habarlaıdy Kazinform menshikti tilshisi.

Oqıǵa týraly aımaqtyń tarıhı murasyn saqtaýǵa arnalǵan Historic Assynt qoǵamdyq uıymy habarlady. Uıymnyń málimetinshe, týrıster qamal qırandylaryna jol ashý úshin qabyrǵanyń bir bóligin buzyp tastaǵan.

Oqıǵa bolǵan kúni qamaldyń janyndaǵy kóldegi sý kóterilip, týrıster ádette qırandylarǵa jaqyndaý úshin paıdalanatyn jaǵajaı bóligin jaýyp tastady. Saıahatshylar áserli fotosýretter túsirý úshin dymqyl qummen júrýden góri ejelgi qalaýdy buzý ońaıyraq dep sheshti.

Historic Assynt mundaı oqıǵalardyń jıilep bara jatqanyn atap ótti. Kelýshiler keremet fotosýretter úshin qabyrǵalarǵa órmeleıdi jáne bul ár joly qurylystyń birtindep tozýyna ákelip otyr. Sondaı-aq qaıyrymdylyq jáshikterinen aqsha urlaý oqıǵalary da tirkelip otyrady, al jınalǵan qarajat jóndeý jumystaryna jumsalatyn edi.

Ardvrek qamalyn shamamen 1490 jyly Shotlandııanyń eń kóne, tekti otbasylarynyń biri salǵan. XVIII ǵasyrdyń basynda ol qaraýsyz qalyp, birtindep Assınt kóliniń jaǵalaýyndaǵy kórkem qırandyǵa aınaldy. Búginde ol Shotlandııanyń soltústigindegi tanymal týrıstik oryn.

Qabyrǵanyń zaqymdalǵan bóligi jóndeldi. Qamaldyń aınalasyna qurmet kórsetýdi suraıtyn qosymsha belgiler ornatyldy, al qaıyrymdylyq jáshiginiń janyna qaıyrymdylyqty onlaın jasaýǵa múmkindik beretin QR- kod ornalastyryldy.

Historic Assynt týrısterdi fotosýret úshin qırandylarǵa shyqpaýǵa jáne tarıhı eskertkishterge uqypty qaraýǵa shaqyrdy.

Eske sala keteıik, buǵan deıin elordada vandaldar qatań jazalanǵanyn jazǵan edik.