Shotlandııada táýelsizdikke arnalǵan referendým bastaldy
ASTANA. QazAqparat - Búgin tańerteń Shotlandııada aımaqtyń táýelsizdigi máselesine arnalǵan tarıhı referendýmy bastaldy. Daýys berý ýchaskeleri jergilikti ýaqytpen 7:00 saǵatta ashyldy. Bul týraly RIA «Novostıǵa» siltememen egemen.kz habarlady.
Daýys berý bıýlletenine «Siz Shotlandııanyń táýelsiz el bolýyna kelisesiz be?» degen jalǵyz ǵana saýal jazylǵan. Daýys berý quqyǵy Brıtanııa azamaty, Brıtanııa Dostastyǵyndaǵy 52 eldiń azamaty, Eýropa odaǵy 27 eliniń azamaty jáne lordtar palatasanyń múshesi, Ulybrıtanııa jáne shet elderde júrgen, biraq Shotlandııanyń saılaý ýchaskelerinde tirkelgen áskerı qyzmetker bolyp tabylatyn Shotlandııa rezıdentterine berilgen.
Al daýys berýshilerdiń jastarynyń tómengi mólsheri 18-den 16-ǵa túsirilgen. Sonda tirkelgen saılaýshylardyń jalpy sany qazir 4 mln. 285 myń adam bolyp otyr. Taǵy 789 myńnan astam adam poshtamen daýys berý úshin tirkelip qoıylypty.
Eger referendým qorytyndysynda joǵarydaǵy suraqqa Shotlandııa turǵyndarynyń basym bóligi «Iá» dep jaýap berse, onda bul olardyń táýelsizdikti qoldaǵandary bolyp tabylady da, aımaq 2016 jyldyń 24 naýryzynan Birikken Koroldik quramynan shyǵady.
Osy kúnge deıin aımaqta júrgizilip kelgen saýalnama kópshiliktiń qaı jaqqa qaraı buratyndaryn naqty kórsetip bere almaı tur. Sebebi, Shotlandııanyń táýelsiz el bolýyn qalaıtyn da, qalamaıtyn da shotlandııalyqtar sany bir-birimen shamalas. Ne bolǵanda da, endi onyń birjaqty jaýaby búgin túnge qaraı belgili bolady.
