Shotlandııa Úkimetiniń basshysy otstavkaǵa ketti
ASTANA. QazAparat - Shotlandııanyń Ulybrıtanııadan bóliný naýqanyna basshylyq jasaǵan eldiń birinshi mınıstri Aleks Salmond otstavkaǵa ketetindigin jarııa etti, dep habarlady sheteldik BAQ.
Onyń atap ótýinshe, Úkimettegi jumysy ómirindegi eń qurmetti qyzmetterdiń biri bolǵan. Sonymen qatar ol referendýmǵa halyqtyń barynsha kóp qatysqandyǵyn ári ol búkil álemdegi joǵary deńgeıde ótkizilgen shara bolǵandyǵyn basa aıtqan.
Aıta keterligi, sál erterek Salmond jeńiliske ushyraǵandyǵyn moıyndap, táýelsizdik úshin daýys bergen 1,6 mln. azamatqa alǵysyn bildirgen edi.
Jalpy, eldiń Ulybrıtanııadan bólinip shyǵýyn Dandı qalasy turǵyndarynyń 57,35 paıyzy qoldaǵan edi. Al Shotlandııa astanasy Edınbýrg qalasynyń turǵyndary bólinýge qarsy shyqqan bolatyn.
