Shotlandııa táýelsizdigin jaqtaıtyndardyń sany 51%-ǵa jetti
ASTANA. QazAqparat - Sońǵy áleýmettik saýalnama Shotlandııa táýelsizdigin jaqtaıtyndardyń sany alǵash ret qarsylastarynan basym túskenin kórsetti, dep habarlady www.24.kz.
Shotlandııa turǵyndarynyń 51 paıyzy Ulybrıtanııadan bóliný úshin daýys berýge daıyn ekenin bildirgen. Al budan bir aı buryn ǵana bólinbeı, bir memlekette qalýdy qalaıtyndar qatary 22 paıyzǵa artyq bolatyn. Sarapshylardyń pikirinshe, táýelsizdik jaqtastary jastardyń arqasynda kóbeıgen. Óıtkeni derbestikke ıe bolsa, konstıtýtsııada tegin joǵary bilim alý quqyǵyn bekitý ýáde etilgen. Shotlandııanyń táýelsizdigi jónindegi referendým 18 qyrkúıekte ótýi tıis. Eger halyqtyń kópshiligi Ulybrıtanııa quramynan shyǵýǵa daýys berse, Shotlandııa 300 jylǵa ulasqan Anglııamen odaqtastyq aıasynan shyǵyp, táýelsiz memleketke aınalýy múmkin.
