Shotlandııa da referendým ótkizýge nıetti

Mınıstrdiń habardar etýinshe, Brıtan úkimeti Shotlandııanyń múddesimen sanaspaı, Eýropalyq odaq quramynan shyǵýdy resmı túrde qolǵa alatyn bolsa, referendým qaıta ótkiziledi. Atap óteıik, Eýropalyq odaqtyń birqatar memleketi resmı Brıýssel men Edınbýrg arasynda Shotlandııanyń Eýroodaqqa múshe bolýy týraly kelissózderge qarsy ekenderin málimdegen edi. Al 15 shildede Ulybrıtanııanyń jańa premer-mınıstri Tereza Meı Edınbýrgke baryp, Shotlandııanyń birinshi mınıstri Nıkola Sterdjenmen «breksıt» máselesin talqylaǵan bolatyn.

Búlikshilerdi ustaý operatsııasy bastaldy

«Interfaks» agenttiginiń taratqan aqparattaryna qaraǵanda, Armenııada Erevandaǵy polıtsııa ǵımaratyna basyp kirip, ondaǵylardy kepilge alǵan oppozıtsııalyq «Quryltaıshy parlament» qozǵalysynyń jaqtastaryn qamaýǵa alýdy bastady.
Muny Armenııa ombýdsmeni ofısindegiler de, atalǵan qozǵalystyń ókilderi de rastady. «Quryltaıshy parlament» jaqtastarynyń qanshasy ustalǵany jóninde qazirge naqty aqparat joq. Shildeniń 17-si, jeksenbi kúni avtomattarmen, tapanshalarmen qarýlanǵan adamdar Erevandaǵy polıtsııa bólimshesi ornalasqan ǵımaratty basyp alǵan edi. Armenııa polıtsııasy basshysynyń orynbasary Ýnan Pogosıannyń aıtýynsha, shabýyl kezinde polıtsııa polkovnıgi Artýr Vanoıan qaza taýyp, podpolkovnıkter Aram Ovannısıan men Grachıa Hostegıan jáne praporşık Gagık Mkrtchıan jaralanǵan. Polıtsııa qyzmetkerlerin kepilge alǵandardyń talaby - osy jyldyń maýsymynda tutqynǵa alynǵan «Jańa Armenııa» jáne «Quryltaıshy parlament» oppozıtsııanyń qozǵalystarynyń jetekshisi J.Sefılıandy bosatý. Keshe ǵımarat ta, kepilge alynǵandar da búlikshilerden bosatyldy.

Qaıǵyly oqıǵaǵa kemsitýshilik sebep bolǵandaı
AQSh-tyń Lýızıana shtatyndaǵy Baton-Rýj qalasynda úsh polıtsııa qyzmetkeri oqqa ushty jáne úsh polıtseı jaralandy. Polıtseıler oqıǵa bolǵan jerge jedel jetken.
Polıtseılerge oq atqan adamnyń aty-jóni Gevın Long degen eken. Kezinde ol Iraktaǵy AQSh áskeriniń quramynda qyzmet etipti. Amerıkalyq buqaralyq aqparat quraldarynyń habarlaýynsha, Gevın Longti polıtseıler atyp óltirgen. Onyń mundaı áreketke barýy kemsitýshilikke baılanysty bolsa kerek. Lýızıana shtatynyń gýbernatory Djon Edvards bul qaıǵyly oqıǵany qalyń kópshilik «birlik pen aıyǵýǵa muqtaj» bolyp turǵan kezde «aıtyp jetkizgisiz jáne aqtaýǵa bolmaıtyn» dep atady. Búginde AQSh-ta Dallasta polıtsııanyń eki qara násildi azamatty atyp óltirgennen keıin jáne qara násildi turǵyndar bes polıtseıdi óltirgen soń eldegi jaǵdaı shıelenisip ketti. Qalalarda narazylyq aktsııasyna shyǵý áreketteri basylmaı tur.

Qysqa qaıyryp aıtqanda:
● Qytaıdyń Fýtszıan provıntsııasynda Nepartak daýylynan 83 adam qurban bolyp, 18 adam iz-túzsiz joǵalǵan. Qurban bolǵandardyń kópshiligi Mıntsın ýeziniń turǵyndary. Daýyldan kelgen ekonomıkalyq shyǵyn 900 mıllıon ıýannan asady.
● Máskeý qalasynda sońǵy 65 jylda bolmaǵan aptap ystyq qala turǵyndary men qonaqtaryn ábigerge salýda. Qalada aýa temperatýrasy 33 gradýstan tómendemeı tur. Aýa raıyn boljaýshylardyń habarlaýynsha, aptanyń ortasynda aptap ystyq jaýyn-shashynǵa ulasýy múmkin.
● Ankara soty Túrkııa áskerı-áýe kúshteriniń generaly Hakan Evrımdi, sonymen birge, taǵy 98 adamdy tutqyndaýǵa sanktsııa berdi. Olarǵa elde áskerı tóńkeris jasaýǵa árekettendi degen kúdik keltirilip otyr.
● AQSh prezıdenttigine úmitkerlerdiń biri - Donald Tramp óz tarapynan eldiń vıtse-prezıdenttigine kandıdatty tańdady. Ol - 57 jastaǵy Indıana shtatynyń gýbernatory Maıkl Pens.

On alty sheteldiktiń úsheýi quryqtaldy
Taıvan polıtsııasy birqatar bank mashınalarynyń kompıýterlik júıesin buzyp, eki mıllıon AQSh dollaryn urlady degen kúdik boıynsha 16 shetel azamatynyń úsheýin ustady.
Aqsha «First Bank» bankiniń bankomattarynan qoldy bolǵan edi. Hakerlik baǵdarlama kómegimen urylar atalǵan banktiń on bankomatynan 80 mıllıon Taıvan dollaryn (2 mıllıon AQSh dollaryna jýyq) alyp ketken bolatyn. Jergilikti meıramhananyń birinde ustalǵan kúdiktiniń biri Latvııa azamaty eken. Al onyń rýmynııalyq eki sybaılasy qonaq úıde qamaýǵa alynǵan. Polıtsııa kúdiktilerden qoldy bolǵan aqshanyń jartysynan astamyn taýypty. Polıtseıler qalǵan kúdiktiler - Reseıdiń eki azamaty men basqalary Taıvan elinen ketip úlgergenin aıtady. Haker-urylardyń bankomattyń baǵdarlamalyq qamtamasyz etý júıesine qalaı engeni belgisiz bolyp otyr.

Teraktiden qansha adam zardap shekti?
«Novostı» aqparat agenttigi Nıtstsadaǵy terrorlyq áreketten zardap shekkenderdiń jalpy sany 303 adam ekenin habarlady. Bul málimet Frantsııa densaýlyq saqtaý mınıstrliginen alynǵan.
Mınıstrliktiń habarlamasynda «14 shilde kúni keshke qaraı Nıtstsada bolǵan terrorlyq aktiler saldarynan 303 adam aýrýhanaǵa tústi. Onyń 121-i áli de emdelip jatyr. Olardyń 30-y jas balalar, barlyǵy da «Lenval» aýrýhanasynda emdelýde. Al 25 adam áli de jansaqtaý bólimshesinde, onyń beseýi bala», - dep kórsetilgen. Shildeniń 14-inde keshkisin Nıtstsa qalasynyń Aǵylshyn jaǵalaýy atalatyn demalys ornynda Bastılııa qamalynyń alynýy kúni merekesine baılanys­ty uıymdastyrylǵan otshashýdy tamashalaýǵa kelgen halyqty júk kóligimen basyp-janshyǵan qaıǵyly jaǵdaı oryn alǵan bolatyn. Sonyń saldarynan 84 adam qaza tapqan edi.

Gýmanıtarlyq daǵdarys ýshyǵa túsýi múmkin
Sırııada úkimet áskeri júz myńdaǵan adammen qorshaýda qalǵan Aleppony syrtqy álemmen jalǵastyryp turǵan jalǵyz joldy japty. Muny Ulybrıtanııada ornalasqan SOHR ortalyǵynyń baqylaýshylary habarlady.
Eldiń úkimet kúshteri men odaqtastary jalǵyz jol jabylǵan soń Aleppoda gýmanıtarlyq daǵdarys qazirgiden de ýshyǵa túsedi dep alańdaýshylyq bildirýde. Baqylaýshylar tobynyń jetekshisi Ramı Abdel Rahman AǴR aqparat agenttigine bergen suhbatynda «Shyǵys bóliktegi kvartaldar endi tolyq qorshaýda qaldy, oppozıtsııa baqylaýyndaǵy aýdanda urys júrip jatyr», - dep atap ótken. Burynyraqta BUU 300 myńǵa jýyq adam azyq-túlik pen dári-dármek alý úshin Kastello jolyna úmit artyp otyrǵanyn eskertken edi.

Internet materıaldary negizinde ázirlendi