Shoshqa tumaýynyń jańa shtamy qaýipti me
Ulybrıtanııa tarıhynda tuńǵysh ret shoshqa tumaýynyń H1N2 shtamyn juqtyrǵan naýqas tirkeldi. Bul ınfektsııa adamǵa tek dońyzdan beriledi jáne sırek jaǵdaıda ǵana adamnan adamǵa juǵady. 2009 jyly osyǵan uqsas H1N1 shtamy álemde shoshqa tumaýynyń pandemııasyn týǵyzyp, 280 myń adamnyń ómirin áketken bolatyn, dep habarlaıdy Kazinform tilshisi.
2009 jyldyń jazynda Brıtan úkimeti mıllıondaǵan sterlıng fýntyn densaýlyq saqtaý salasyna quıyp, dárilerdiń qoryn jasady. Maqsat — jahandy jalmaǵan shoshqa tumaýynyń taraýyn toqtatý.
Soltústik Amerıkadan bastaý alǵan vırýsty Dúnıejúzilik densaýlyq saqtaý uıymy pandemııa dep jarııalady.
Ulybrıtanııada aýrýdan 500-ge jýyq adam qaıtys boldy. Onyń 70-i bala edi.
Osy aptada Densaýlyq saqtaý agenttigi jergilikti turǵyn shoshqa tumaýyn juqtyrdy dep dabyl qaqty.
«Infektsııanyń adamdar arasynda azdap taraýy múmkin. Biz qandaı da bir juqtyrý faktileriniń bolǵan-bolmaǵanyn túsiný úshin epıdemııalyq qadaǵalaý jumysyn kúsheıtip jatyrmyz. Aqparat naqtylanǵan keıin vırýstyń qanshalyqty keń taralǵanyn bilemiz», — deıdi Ulybrıtanııa Densaýlyq saqtaý agenttiginiń bas ǵylymı keńesshisi Izabel Olıver.
Shoshqadan adamǵa juǵatyn tumaýdyń úsh túri bar. Birinshisi — H1N1 pandemııalyq shtamy. Ol 14 jyl buryn shoshqa tumaýy degen ataýǵa ıe bolyp, adamdar arasynda áli de tarap júr.
Budan bólek H3N2 jáne H1N2 vırýstary bar. Sońǵysy 2005 jyldan beri 50 adamnyń aǵzasynan tabylǵan, biraq birinshi ret Ulybrıtanııada anyqtalyp otyr.
«Biz janýarlardyń patogenderin, vırýstaryn, bakterııalaryn únemi juqtyryp otyramyz. Biraq bul óte sırek kezdesetin jaǵdaı ekenin este ustaǵan jón jáne bul ınfektsııalarǵa bizdiń aǵzamyz qarsy tura alady. Áıtpese, únemi osyndaı jaǵdaılar tirkeler edi. Buǵan qatty ýaıymdaýdyń qajeti joq, biraq qadaǵalaýdy qajet etedi», - deıdi Glazgo ýnıversıtetiniń professory, vırýsolog Pablo Mýrsııa.
Soltústik Iorkshırde anyqtalǵan naýqas tynys alýymda kinarat bar dep dárigerdiń kómegine júgingen. Onyń shoshqamen tikeleı jumys istegendigi týraly aqparat joq. Sheneýnikter qazir naýqastyń kimmen baılanysta bolǵanyn anyqtap jatyr.
«Óte muqııat jáne keń kólemde jasalǵan skrınıngtiń nátıjesinde anyqtalǵan adamnyń qazir jaǵdaıy jaqsyraq. Qýanyshqa oraı, aýrý belgileri jeńil boldy. Qazir ol tolyq qalpyna keldi», - deıdi Ulybrıtanııa Densaýlyq saqtaý jáne áleýmettik qorǵaý jónindegi memlekettik mınıstri Vıktorııa Atkıns.
Dáriger-mamandar respıratorlyq ınfektsııa belgileri anyqtalǵan jaǵdaıda úıde otyryp, aýrý belgileri basylǵansha basqalarmen qarym-qatynasta bolmaýǵa shaqyrady.
Ásirese osal topqa jatatyn adamdardan aýlaq bolý kerek.
Óıtkeni 5 jasqa deıingi balalar, 65 jastan asqan qart kisiler jáne júkti áıelder ınfektsııany juqtyryp alǵan jaǵdaıda aýrýdy asqyndyryp alýy ábden múmkin.
