Shoshqa fermasy daýy: Ekologııa mınıstri Aqtóbe oblysyndaǵy aýyl turǵyndarymen kezdesti

AQTÓBE. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev Aqtóbe oblysyna sapary barysynda Alǵa aýdany Bestamaq aýylyndaǵy shoshqa fermasyna bardy. Aýyl belsendileri ferma jumysynyń qorshaǵan ortaǵa tıgizip jatqan zııany, ekologııalyq talaptardyń buzylýy týraly baıandady, dep habarlaıdy QazAqparat vedomstvonyń baspasóz qyzmetine silteme jasap.

Mınıstr Myrzaǵalıev pen Aqtóbe oblysynyń ákimi Ońdasyn Orazalın sharýashylyq mekemesine qatysty tekserý qorytyndylaryn jedeldetip, máseleniń zań aıasynda oryndy sheshilýine birlese yqpal jasaıtyndaryn jetkizdi.

«Biz jaǵdaıdan habardarmyz, túsirgen barlyq vıdeolaryńyzdy kórdik. Óńirlerde ne bolyp jatqanyn bilemiz. Máseleni zańdy túrde aıaǵyna deıin jetkizý kerek. Biz tekserý protsesterin jedeldetýge atsalysamyz»,- dedi mınıstr.

Jergilikti halyq máseleniń sheshilýine óz taraptarynan barynsha kómek kórsetýge daıyn ekenderin aıtty.

«Jerlesterimizdiń talap-tilekteri oryndy. Osy másele kóterilgen kúnnen bastap, aýyl turǵyndary sabyrlyq tanytyp, túsinistikpen qarap keledi. Shoshqa fermasy baǵytyn ózgertýi kerek nemese jumysyn toqtatýy qajet. Degenmen, bul bir kúnniń sharýasy emes, qazir quzyrly mekemeler tarapynan qajetti sharalar qabyldanyp, jumys júrip jatyr», - dep aıtty óńir basshysy Ońdasyn Orazalın.

Eske salsaq, 2020 jyly qarasha aıynda Bestamaq aýylynyń turǵyndary shoshqa fermasyn jabýdy talap etken bolatyn. Jospardan tys tekserý nátıjesinde las zattar shyǵaryndylarynyń shamadan tys kólemi men qaldyqtary kómý, óndiristik sýdy ruqsatsyz tógý faktileri úshin fermaǵa 7 mlrd teńgege jýyq aıyppul salyndy. Qazirgi ýaqytta sot protsesteri jalǵasyp jatyr.