Shoshqa fermasyndaǵy tórt adamnyń ólimi: sot úkimi shyqty

PETROPAVL. KAZINFORM – Soltústik Qazaqstan oblysynda shoshqa fermasynda tórt jumysshynyń ólimine ákelgen oqıǵanyń núktesi qoıyldy. Aqqaıyń aýdandyq soty qylmystyq isti qarap, úkim shyǵardy.

Aqqaıyń aýdandyq sotynyń málimetinshe, oqıǵa byltyr 1 tamyzda Novoıvanovka eldi mekeninde boldy. Fermanyń kárizdik qudyǵyn tazalaýǵa túsken tórteý qaıtyp shyqpaǵan. Olardyń metan jáne kúkirtsýtek gazyna ýlanyp, esinen tanyp, keıin batyp ketkeni belgili boldy.

«Olar eńbek qaýipsizdigi jáne eńbekti qorǵaý jónindegi nusqaýlyqtyń talaptaryn elemegen. Jumysshylar belgilengen tártippen eńbekti qorǵaý jónindegi jospardan tys nusqaýlyqtan ótpegen, soǵan qaramastan káriz qudyǵynyń ishinde ornalasqan sýasty sorǵysynyń shlangisin jóndemek bolǵan. Qudyqtyń ishindegisin tolyǵymen soryp almaı, jeke qorǵanys quraldaryn paıdalanbaı, jumysshylar kezekpen qudyqqa túsken», - delingen baspasóz habarlamasynda.

«Eńbekti qorǵaý erejelerin buzý» baby boıynsha qylmystyq is qozǵalyp, eki adam, sonyń ishinde mert bolǵan – kárizdik-sorǵy stansasynyń basshysy A. jáne eńbekti qorǵaý jáne qaýipsizdik qyzmetiniń jetekshisi M. kináli dep tanyldy. Sot A. men M.-ny aqtap, olardyń isinde qylmystyq quqyqbuzýshylyq joq dep tapty.

«JShS-de jeke qorǵanýdyń qajetti quraldary joq ekeni anyqtaldy, ıaǵnı jumysshylar gaztutqyshtarmen jáne zııandy zattardy anyqtaý úshin qajetti arnaıy qural - gaz taldaǵyshpen qamtamasyz etilmegen. Budan basqa, qudyqtyń paıdalanýǵa berý aktisi bolmaǵan jáne ýákiletti organdarmen kelisýsiz paıdalanylǵan, qudyqty JShS ishki aktimen iske qosqan», - delingen habarlamada.

Aqtalǵandardyń ońaltýdan ótý quqyǵy bar.

Úkim zańdy kúshine engen joq.

Buǵan deıin Atyraýda seriktestik dırektorynan 6 mln teńge para alǵan sheneýnik 4 jylǵa sottalǵanyn jazǵan edik.