Shoshqa etinen «Musylman» shujyǵyn óndirip jatqan jeke kásipkerge qatań shara qoldanylsa ıgi

Búgin QR Parlamenti Májilisiniń jalpy otyrysynda QR Premer- Mınıstriniń orynbasary - Indýstrııa jáne jańa tehnologııalar mınıstri Áset Isekeshovtyń atyna saýal joldaǵan depýtat Baǵıla Birmaǵambetova osy máseleni kóterdi.

«Jaqynda «Habar» arnasyndaǵy «Sonymen, solaı deıik...» baǵdarlamasyna qatystym. Onda Qazaqstan tamaq ónerkásibinde «Halal» brendin damytý, halal ónimderin shyǵarǵan kezde halyqaralyq standarttardyń saqtalýy, ónimdi ishimdikten jáne shoshqa etinen jeke saqtaý, maldy soıý, halal-dámdeýishterin paıdalaný, janýarlar maıyn jáne ár túrli zııandy qospalar paıdalanýǵa tyıym salý sekildi máseleler talqylandy. Soǵan oraı, baǵdarlama barysynda «Halal» jáne «Musylman» shujyqtarynyń birneshe túri ákelinip, olarǵa 3-5 mınýttyń ishinde shoshqa etiniń, soıanyń, qurǵaq súttiń jáne taǵy basqalardyń bar-joǵyn aıqyndap beretin testilerdiń kómegimen jedel-saraptaý jasalǵan bolatyn. Sonyń barysynda «Medennıkov» jeke kásipkerligi shyǵaryp jatqan barlyq «Musylman» shujyqtarynda shoshqa etiniń bolýy meni tań qaldyrdy. Medennıkov myrza musylmannyń shoshqa etin haram etkenin bilmeı me eken, nege «Musylman» dep dońyz eti qosylǵan shujyqty atap otyr?», - deıdi B. Birmaǵambetova.

Osyǵan oraı, depýtat vıtse-premerden jedel-saraptamamen anyqtalǵandaı atyna saı kelmeıtin «Musylman» shujyǵyn jasaǵan «Medennıkov» jeke kásipkerligin jáne onyń fılıaldaryn tekserip, qatań sharalar qabyldaýdy surady. Atalǵan kásiporyn jylyna shamamen 229 tonna shujyq ónimin shyǵaryp, ony 6 fılıaly arqyly satady eken. «Óz jumysyna jaýapsyz qaraıtyn óndirýshilerdi lıtsenzııadan aıyrý qajet», - dedi depýtat.