Shortandydaǵy gaz ballonynyń jarylý sebepteri anyqtaldy
KÓKShETAÝ. QazAqparat - Shortandy kentindegi úsh páterli úıde gaz ballonynyń jarylýyna órt qaýipsizdigi erejesiniń saqtalmaýy sebep bolǵan. Bul týraly brıfıngide Aqmola oblystyq TJD bastyǵynyń orynbasary Manarbek Shapaǵatov málim etti, dep habarlaıdy QazAqparat tilshisi.
«Aldyn ala anyqtalǵandaı, órttiń shyǵýyna qarapaıym órt qaýipsizdigi, ıaǵnı gaz qurylǵysyn paıdalaný erejesiniń saqtalmaýy sebep bolǵan. Qazirgi kezde saraptama taǵaıyndalyp, zerttelýde. Jarylys saldarynan turǵyn úıdiń shatyry men páterlerdi bólip turatyn ishki qabyrǵalar opyrylyp tústi. Gaz ballony jarylǵan páterde bir otbasy turǵan. Sol kúni onda qonaq shaqyrylǵan. Zardap shekkenderdiń barlyǵy sol úıdiń turǵyndary emes, arasynda balalarymen birge qonaqqa kelgender de bar. Kórshi páterdegi adamdar zardap shekken joq. Olarǵa tek materıaldyq shyǵyn keldi», - dedi Manarbek Shapaǵatov.
Eske sala ketsek, keshe Shortandy kentinde barak tıpti úsh páterli úıde gaz ballony jaryldy. Oqys oqıǵa týraly habarlama órt sóndirý bólimine saǵat 21:38-de kelip túsken. Órtti sóndirýge TJD-nyń 35 qyzmetkeri men 7 tehnıkasy, «Jer Ana» JShS MEÓQQ-nyń 4 qyzmetkeri men 1 tehnıkasy jumyldyrylǵan.
Qazirgi málimet boıynsha, úıindiniń astynan úsh adamnyń denesi tabyldy, onyń bireýi kámelettik jasqa tolmaǵan bala. Sonymen birge, túrli deńgeıdegi dene kúıigimen 10 adam aýrýhanaǵa jatqyzyldy, onyń ishinde balalar bar. Keıbir zardap shekkenderdiń jaǵdaıy aýyr.
