Shortandyda zardap shekkenderge 6 medıtsınalyq brıgada kómek kórsetti
KÓKShETAÝ. QazAqparat - Shortandy kentindegi úıde gaz ballonynyń jarylýy saldarynan zardap shekkenderge 6 medıtsınalyq brıgada kómek kórsetti. Bul týraly jýrnalıstermen ótken brıfıngte Aqmola oblystyq jedel járdem stantsııasynyń bas dárigeri Aleksandr Vysotskıı málim etti, dep habarlaıdy QazAqparat tilshisi.
Onyń aıtýynsha, jedel járdem kómegine polıtsııa qyzmetkerlerinen 16-da qarasha da keshki saǵat 21:15 shaqyrý kelgen. Onda gaz ballony jarylǵandyǵy jáne úı órtenip, zardap shekkender bary aıtylǵan. Saǵat 21:16-de shaqyrý birden jedel járdem brıgadasyna joldandy. Oqıǵa ornyna Shortandydaǵy medıtsınalyq kómek stansııasynyń eki brıgadasy jetip, sol jerde zardap shekkenderge alǵashqy medıtsınalyq kómek kórsetti.
«Eresekter dalada, al balalar kórshilerinde boldy. Olar dereý Shortandy aýdandyq aýrýhanasyna jetkizildi. Budan bólek, qosymsha kómekke Aqkól, Arshaly aýdandary jáne Jaltyr bólimshesinen jedel járdem brıgadasy, sondaı-aq, eki sanavıatsııa brıgadasy jetti. Birinshi brıgdada hırýrg reanımatolog bolsa, ekinshisinde Kókshetaý qalasynan balalar reanımatology bar. Jalpy, zardap shekkenderge sol kúni alty jedel járdem brıgadasy kómekke tartyldy», - dedi Aleksandr Vysotskıı.
Eske sala ketsek, keshe túnde Shortandy kentinde barak tıpti úsh páterli úıde gaz ballony jaryldy. Aqmola oblystyq TJD bastyǵynyń orynbasary Manarbek Shapaǵatovtyń aıtýynsha, órttiń shyǵýyna qarapaıym órt qaýipsizdigi, ıaǵnı gaz qurylǵysyn paıdalaný erejesiniń saqtalmaýy sebep bolǵan.
Aqmola oblysynyń densaýlyq saqtaý basqarmasynyń basshysy Narıman Syzdyqovtyń málimdeýinshe, jarylystan zardap shekken eki balanyń jaǵdaıy óte aýyr, deneleriniń 90 paıyzyn kúıik shalǵan.
«Bizdegi málimet boıynsha úsh adam kóz jumyp, on adam zardap shekti. Jalpy, aýrýhanaǵa 11 adam jetkizildi, onyń ishinde bir qyz bala ambýlatorııada em qabyldaýǵa jiberildi. Tórt bala shuǵyl Nur-Sultan qalasyndaǵy №2 balalar aýrýhanasynyń anestızııa jáne jansaqtaý bólimshesine jatqyzyldy. Eki eresek adam Nur-Sultandaǵy №1 qalalyq aýrýhananyń kúıik bólimshesine ornalastyryldy. Sonymen birge, Shortandy aýdandyq aýrýhanasynda bir bala men bir áıel stantsıonarlyq em qabyldaýda. Qalǵan zardap shekkender ambýlatorııada em qabyldaıdy. Jansaqtaý bóliminde jatqandardyń jaǵdaıy óte aýyr. Onda jatqan eki balanyń biri, 2009 jylǵy ul men 2012 jylǵy qyzdyń deneleriniń 90 paıyzyn kúıik shalǵan. Olar ókpeni jeldetý apparatyna qosylǵan. Kúıik bólimshesine túsken eki er adamdardyń jaǵdaıy da óte aýyr. Olardyń denesiniń 70 jáne 40 paıyzyn kúıik shalǵan», - dedi Narıman Syzdyqov.
