Shortandy aýdanynyń aýyl sharýashylyǵy ónimderi elorda bazarlarynda satylýda
KÓKShETAÝ. QazAqparat - Shortandy aýdanynyń aýyl sharýashylyǵy ónimderi Nur-Sultan qalasy bazarlarynda satylýda. Bul týraly brıfıngte aýdan ákimi Ǵaıdar Qasenov aıtty, dep habarlaıdy QazAqparat tilshisi, oblystyq ishki saıasat basqarmasyna silteme jasap.
Aýdanda on aı ishinde aýyl sharýashylyǵy taýarlarynyń ónimi 31 mıllıard teńgeni qurap, byltyrǵy jyldyń sáıkes kezeńimen salystyrǵanda 50 paıyzǵa artqan. Naqty kólem ındeksi 124 paıyzdy qurady. Bul – oblys boıynsha besinshi oryn. Osy rette, agrarly aýdan astyqtyń shyǵymy jaǵynan oblysta eń joǵary kórsetkishke qol jetkizdi.
«Aýdan dıqandary jalpy 119 myń gektar alqaptan 312 myń tonna astyq jınady. Ár gektardan 15,7 tsentnerden bıdaı alyndy. Sonymen birge, 5,6 myń tonna maıly daqyl, 1,4 myń tonna kókónis jáne 5,6 myń tonna kartop jınaldy», – dedi Ǵaıdar Qasenov.
Osy rette, aýdanǵa kóktemgi dala jumystary úshin 6,7 myńnan astam tonna kepildendirilgen dızel otyny jáne 563 mıllıon teńge sýbsıdııa bólinipti. Aýdandaǵy sharýashylyqtar 47 myń tonna shóp daıyndaǵan. Mashına-traktor parki de jańartylýda. Bul úshin 2,8 mıllıard teńge qarjy bólinip, oǵan 63 dana aýyl sharýashylyǵy tehnıkasy satyp alynǵan.
Aýdanda mal basy da kóbeıip keledi. Osynyń nátıjesinde on aıdyń ishinde barlyǵy 3 myń tonnadan astam et, 13 myń tonnadan astam sút, 3 mıllıon dana jumyrtqa óndirildi. Memleket basshysynyń Nur-Sultan qalasy aınalysynda azyq-túlik beldeýin damytý jónindegi tapsyrmasyn oryndaý sheńberinde aýdan astanaǵa aýyl sharýashylyǵy ónimderin turaqty túrde jetkizip turady. Nur-Sultan qalasynyń bazarlarynda «Temesh» sharýa qojalyǵy «Volojanın» jeke kásipkerligi, «Molochnyı 2» aýyl sharýashylyǵy kásipkerliginiń ónimderi satylady.
«Aýdanda «Tónkeris» astyq qabyldaý orny men «Capital Trade House» dıirmen kesheni tolyq qýatyna shyqty. Osy eki kásiporyn jalpy quny 2,6 mıllıard teńgeniniń 20 myń tonna unyn óndirdi. Ústimizdegi jyldyń qyrkúıek aıynda «Qarapaıym zattar ekonomıkasy» baǵdarlamasy sheńberinde «Mılk Prodýkt» seriktestigi Germanııadan 128 bas saýyn sıyr ákelip, qazirgi zamanǵa saı jabdyqtalǵan taýarly – sút fermasyn ashty. 450 bas iri qaraǵa arnalǵan etti baǵyttaǵy 4 ferma ashý jumystary júrgizilýde», – dedi Ǵaıdar Qasenov.
