Short-trekten myqtylardyń qatarynan udaıy kóringimiz keledi - bas bapker
ASTANA. QazAqparat - Short-trekten álemdegi myqtylardyń qatarynan udaıy kóringimiz keledi. Bul týraly Qazaqstan quramasynyń bas bapkeri Mádiǵalı Qarsybekov QazAqparat tilshisine aıtyp berdi.
Onyń aıtýynsha, Kanadanyń Kalgarı qalasyndaǵy álem kýbogynyń alǵashqy kezeńi qazaqstandyqtar úshin sátti boldy.
Atap aıtqanda, erler arasynda Abzal Ájiǵalıev 500 metr qashyqtyqta fınalda úsh birdeı Olımpıada chempıonymen jarysqa túsip, Qazaqstan rekordyn jańartyp, kúmis júldeger atandy.
Oǵan qosa Erkebulan Shamuhanov 1 myń metr qashyqtyqta márege besinshi keldi.
Erler burynnan jaqsy nátıjelerimen kózge túsip júrse, bul joly qyzdarymyz da qýantty. Olar áıelder estafetasynan besinshi orynǵa kóterildi. Sondaı-aq, aralas estafetadan qazaqstandyq qurama osyndaı nátıje kórsetti.
-Mádiǵalı Ábdiǵalıuly, munyń syry nede dep oılaısyz?
-Qyzdarymyzdyń kórsetkishin kóterý úshin ońtústikkoreıalyq Álııa Kımdi (Kım A Iong) qatarymyzǵa qosqan edik. Bul óz jemisin berdi. Sonyń nátıjesinde Anastasııa Krestovanyń sheberligi arta tústi. Sol sekildi 16 jasar Ásel Taıshymanovadan úlken úmit kútemiz. Mádına Janbosynova aıaǵyn aýyrtyp alǵandyqtan, onyń ornyna Olga Tıhonovany shyǵardyq.
-Álem kýbogynyń ekinshi kezeńi AQSh-tyń Solt-Leık-Sıtı qalasynda 9-11 qarasha kúnderi ótedi eken, oǵan Qazaqstannan kimder qatysady?
-Onda erlerden Denıs Nıkısha, Erkebulan Shamuhanov, Mırsaıd Jaqsybaev, Nurtilek Qajyǵalı óner kórsetedi. Olar jekeleı qashyqtyqta, sondaı-aq estafetada jarys jolyna shyǵady. Kalgarıda qatysýshylar 500 metrge eki retten júgirgen bolatyn. Bul joly 1 myń metrden eki márte jarys bolady. Ár álem kýbogy saıyn qashyqtyqtar osylaısha kezektesip, ózgerip otyrady. Qyzdardan Solt-Leık-Sıtıde Álııa Kım men Olga Tıhonovaǵa úmit artamyz. Aralas estafetada Kalgarıde Abzal men Denıs, qyzdardan Álııa Kım men Anastasııa Krestova júgirgen edi. Bul joly Denıs pen Mırsaıd, Álııa men Olıa aralas estafetadan synǵa túsedi.
-Jańa maýsym jaqsy bastalyp jatyr eken, aldaǵy maqsat qandaı?
-Basty mindet - álem kýbogy kezeńderin sátti ótkizip, barynsha mol upaı jınap, sheberligimizdi shyńdaı túsý. Álem kýbogynyń tórt kezeńiniń qorytyndysy boıynsha segiz úzdik qurama álem chempıonatyna joldama alady. Mine, sol aıtýly dodada estafetalyq synda da jarys jolyna shyqsaq pa deımiz. Bıyl reseılik shorttrekshilermen birge jattyǵýdamyz. Túpki maqsat - el quramasymen birge oǵan bolashaqta qosyla alatyn keıingi jastardy da nazardan tys qaldyrmaı, Olımpıadada olja salý.
Eske sala keteıik, budan eki jyl buryn batysqazaqstandyq Abzal Ájiǵalıev dál osy Solt-Leık-Sıtı qalasynda 500 metr qashyqtyqta el tarıhynda alǵash ret álem kýbogy kezeńiniń jeńimpazy atanǵan bolatyn. Abzal bıyldan bastap Astana atynan jarysqa shyǵyp júr. Degenmen el quramasy sapynda BQO-dan túlep ushqan Nurbergen Jumaǵazıev, Nurtilek Qajyǵalı jáne Ádil Ǵalıahmetov bar.
