Short-trekten el chempıonatynda BQO quramasy ekinshi orynǵa ıe boldy
ORAL. QazAqparat - Qaraǵandy qalasynda short-trekten ótken el chempıonatynda BQO quramasy jalpykomandalyq esepte ekinshi orynǵa ıe boldy, dep habarlaıdy «QazAqparat» tilshisi.
Short-trekten Qazaqstannyń eńbek sińirgen jattyqtyrýshysy Maksım Lozovoıdyń aıtýynsha, tórt jas ereksheligine qaraı ótken atalmysh birinshilikke BQO-dan basqa Qaraǵandy, Ońtústik Qazaqstan, Shyǵys Qazaqstan, Qostanaı oblystary men Astana, Almaty qalalarynan komandalar qatysyp, baq synady.
Jarys qorytyndysynda M.Lozovoımen birge bapkerler Danabek Qaıyrov, Erhat Qubashev daıyndap aparǵan BQO quramasy 5 altyn, 9 kúmis, 11 qola júldeni jeńip aldy.
Kishi toptaǵy jasóspirimder arasynda quramynda Álıhan Qanat, Shyńǵys Ermek, Álibek Ǵubaev, Maqsat Ýálıolla bar tórttik estafetalyq jarysta chempıon atandy. Sol sekildi kishi toptaǵy qyzdar arasynda Narǵyz Omarova, Alına Ájiǵalıeva, Gúlbaǵym Qalı estafetadan birinshi keldi. Orta jastaǵylar arasynda estafetalyq synda Álisher Ábilqatymov, Saıat Dakıshev, Eseı Ibraev, Ersinhan Aımyrza jáne Renata Qulperdesova, Anelıa Kereı, Aqbota Saǵdıeva ekinshi orynnan kórindi.
Jekeleı synda kishi toptaǵy qyzdar arasynan Alına Ájiǵalıeva 333 jáne 500 metr qashyqtyqta jeńimpaz atansa, 777 metrden márege úshinshi bolyp jetti. Narǵyz Omarova 777 metrden birinshi, 500 metrden ekinshi, 333 metrden úshinshi orynǵa kóterildi. Qyzdar arasynda Gúldana Jalmuqan 500 metrden kúmis, 333 metrden qola júldeni oljalady. Orta jastaǵy jasóspirimder arasynda Álisher Ábilqatymov 1 myń metrden, Eseı Ibraev 777 jáne 1 myń metrden úshinshi oryndy enshiledi. Kishi toptaǵylardan Álıhan Qanat 777 metrden úshinshi, 333 metrden ekinshi, Shyńǵys Ermek 333 jáne 500 metrden úshinshi orynǵa ıe boldy. Balalar arasynda Merhat Turarbekov 500 metrden kúmis, 222 jáne 333 metrden qola júldeni qanaǵat tutty.
