Short-trekten el chempıonaty: elordalyq sportshy 500 metrge jarysta jeńiske jetti
ASTANA. KAZINFORM — Elordanyń «Saryarqa» velotreginde short-trekten Qazaqstan chempıonatynyń ekinshi jarys kúnindegi jeńimpazdary anyqtaldy. Bul týraly elorda ákimdiginiń resmı saıty jazdy.
Jarystyń ekinshi kúninde sportshylar sprıntte (500 metr) jekeleı synǵa túsip, áıelder jáne erler komandalyq estafetada ózara myqtyny anyqtady.
Erler arasynda 500 metrge jarysta Ulttyq qurama kóshbasshylarymen qosa jas sportshylar synǵa tústi. Tartysty fınalda 20 jastaǵy Astana qalasynyń sportshysy Aıbek Násen aǵa býyndaǵy qarsylastarynan asyp túsip, chempıon atandy. Kúmis júldeni taǵy bir jerlesimiz Abzal Ájiǵalıev enshiledi.
Áıelder arasynda qyzyq, ári tarıhı oqıǵa tirkeldi. Birden úsh sportshyǵa qola júlde tabystaldy. Halyqaralyq konkıshiler odaǵynyń (ISU) jańa erejesine sáıkes, ulttyq chempıonattar men halyqaralyq jarystardyń fınalynda birneshe sportshy penaltı alsa, olardyń bárine úshinshi oryn beriledi.
Endi jekeleı synnyń «V» fınalynda 5-8 orynǵa talasqan sportshylar júldeli orynǵa deıin kóterile almaıdy. Ondaı múmkindik tek Olımpıada, Azııa oıyndary, Ýnıversıada sekildi úlken jarystarda ǵana beriledi. Osylaısha, 500 metrde Astanalyq arý Malıka Ermek tuǵyrdyń úshinshi satysyna kóterildi.
Komandalyq áıelder estafetasynda (3000 m) Astana komandasy top jardy. Batys Qazaqstan oblysy ekinshi orynǵa turaqtap, Qostanaı oblysynyń qyzdary qola enshiledi.
Erler arasyndaǵy komandalyq jarysta (5000 m) Astana qalasynyń sportshylary taǵy da chempıon atansa, Aqmola oblysy kúmis júldeger, Shymkent qalasynyń short-trekshileri qola júldeger atandy.
Endi 1000 metr men aralas komandalyq estafetanyń jeńimpazdary anyqtalady. Al 5 qazanda bapkerler men tóreshiler quramy jalpy jınalys ótkizip, irikteýden sátti ótken jáne álemdik jarystarǵa joldama alǵan sportshylar tizimin jarııalaıdy.
