Short-trekten álem kýboginde qazaqstandyq úzdik atandy
ASTANA. QazAqparat – Qazaqstandyq Denıs Nıkısha short-trekten álem kýboginiń qorytyndysy boıynsha úzdik atandy, dep habarlaıdy QazAqparat tilshisi.
Denıs Nıkısha 500 metr qashyqtyqta jalpy esepte kósh bastady.
Barlyǵy 402 upaı jınaǵan qazaqstandyq shorttrekshi birinshi orynǵa ıe boldy.
Denıs áýeli ótken jyly AQSh-tyń Solt-Leık-Sıtı qalasynda ótken álem kýbogi kezeńinde kúmis júldeger atandy. Sodan keıin Almatydaǵy eki kezeń barysynda altyn, kúmis jáne qola medal jeńip aldy.
Nıderland eliniń Dorteht qalasynda ótken álem kýboginiń altynshy kezeńinde qazaqstandyqtar júldege ilige almady. Ásirese, erler quramasy 5 myń metrlik estafetada úzdik tórt komanda sapynda fınalǵa shyǵyp, júldege jaqyn turdy. Ókinishke qaraı, jarys barysynda sportshylardyń biri qulap qalyp, qazaqstandyqtar úzdik úshtikke ilige almady.
Short-trekten Qazaqstan ulttyq quramasynyń bas bapkeri Nurbergen Jumaǵazıevtiń aıtýynsha, endigi basty meje – Ońtústik Koreıa astanasy Seýlde 10-12 naýryzda ótetin álem chempıonatynda sátti óner kórsetý.
«Endi Astanaǵa oralyp, daıyndyqty bastaımyz. Jyldyń eń basty dodasynda 500, 1000 jáne 1500 metr qashyqtyqta jigitter men qyzdar synǵa túsedi. Sondaı-aq 2 myń metr qashyqtyqta qazaqstandyqtar mıksten jarys jolyna shyǵady. Oǵan qosa erler 5 myń, qyzdar 3 myń metrlik estafetada baq synaıdy», dedi QazAqparat tilshisine N.Jumaǵazıev.
Eske sala keteıik, budan buryn Denıs Nıkıshanyń álem kýbogi kezeńiniń chempıony atanǵanyn jazǵan bolatynbyz.
