Short-trekten álem kýbogi kezeńinde Qazaqstan taǵy eki medal aldy
ASTANA. QazAqparat – Short-trekten AQSh-tyń Solt Leık Sıtı qalasynda ótken álem kýbogi kezeńi qazaqstandyqtar úshin sátti boldy, dep habarlaıdy QazAqparat tilshisi.
Jarystyń ekinshi kúni taǵy eki qazaqstandyq medalǵa ilikti.
Ulttyq quramadaǵy tájirıbeli sportshylardyń biri Denıs Nıkısha 500 metr qashyqtyqta máre syzyǵyn ekinshi bolyp qıdy. Denıstiń kórsetkishi – 40.675. Sóıtip ol kúmis medalǵa ıe boldy.
Sondaı-aq Ádil Ǵalıahmetov 1 myń metr qashyqtyqta 1.25:325 sekýnd kórsetkishpen qola júldeger atandy. Bul – Oral short-treginiń túlegi, qazir Aqtóbe oblysy atynan synǵa túsip júrgen Ádildiń álem kýbogi kezeńindegi ekinshi medali. Ótken jyly Beıjińde 1500 metrde kúmis júldeni enshilegen bolatyn.
Osylaısha, Qazaqstan quramasy álem kýboginiń bıylǵy ekinshi kezeńinde úsh medal aldy. Alǵashqy kúni Abzal Ájiǵalıev 500 metrden kúmis júldeger atandy.
Bas bapker Nurbergen Jumaǵazıev bastaǵan mamandar jattyqtyratyn qazaqstandyqtar Solt-Leık-Sıtı kezeńine tolyq quramda qatysty. Qazaqstan erler quramasy 5 myń metr estafetalyq jarysta tórtinshi orynǵa taban tiredi. Áıelder 3 myń metrlik estafetada altynshy satydan kórindi. Sonymen qatar batysqazaqstandyq Nurtilek Qajyǵalı (bapkeri – Maksım Lozovoı)1500 metr qashyqtyqta besinshi bolyp keldi. Bul – onyń óz sporttyq jolyndaǵy úzdik kórsetkishi.
Monreal (Kanada) qalasynda ótken álem kýboginiń alǵashqy kezeńinde erler quramasy estafetada kúmis júldeni ıelengen edi.
Endi álem kýbogi kezeńi jeltoqsanda Almatyda ótedi.
Eske sala keteıik, budan buryn Abzal Ájiǵalıevtiń short-trekten álem kýbogi kezeńiniń kúmis júldegeri atanǵanyn jazǵan bolatynbyz.
