Short-trekten álem chempıonatynda Qazaqstan quramasy bir kúmis, úsh qola medal aldy
ASTANA. KAZINFORM — Kanadanyń Kalgarı qalasynda short-trekten jastar arasyndaǵy álem chempıonaty Qazaqstan quramasy úshin sátti aıaqtaldy.
Batysqazaqstandyq shorttrekshi Alına Ájiǵalıeva 1 myń metr qashyqtyqta óner kórsetip, qola medaldi el qorjynyna saldy.
Óziniń aıtýynsha, aldyńǵy eki oryn koreıalyq sportshylarǵa buıyrdy.
Alına Ájiǵalıeva ótken jyly Polshanyń Gdansk qalasynda qazaqstandyq qyzdar arasynan alǵash ret jastar arasynda álem chempıonatynda 1 500 metr qashyqtyqta kúmis medaldi oljalaǵan edi.
— Álemdik dodada ekinshi ret júlde alǵanyma qýanyshtymyn. Jastar arasynda álem birinshiligi osymen aıaqtaldy. 1 500 metr qashyqtyqta jáne estafetalyq jarysta da baq synadyq. Endi 14-16 naýryzda Qytaı astanasy Beıjińde eresekter arasynda ótetin álem chempıonatyna qatysamyn, — dedi Kazinform tilshisine halyqaralyq dárejedegi sport sheberi A.Ájiǵalıeva.
Short-trekten BQO quramasynyń aǵa bapkeri, Qazaqstannyń eńbek sińirgen jattyqtyrýshysy Maksım Lozovoıdyń naqtylaýynsha, Kalgarıdegi álem chempıonatynda 40-tan astam elden 250-den astam sportshy baq synady.
A.Ájiǵalıeva jekeleı qashyqtyqtan basqa estafetalyq synda da júldege ilikti.
Qazaqstan quramasy 2 myń metrlik mıksten qola júldeni enshiledi. El namysyn A.Ájiǵalıevadan basqa Anastasııa Galeıchına (Qostanaı), Zeınep Qumarqan (ShQO), Bogdan Vehov, Dinmuhamedaldııar Tájibaı, Nurlan Qaıyrbekov (bári de Astana) qorǵady.
Qyzdar komandasy (A.Ájiǵalıeva, A.Galeıchına, Z.Qumarqan jáne qostanaılyq Palına Amelchýk) 3 myń metrlik estafetada kúmis júldeger atandy.
Sondaı-aq jigitter quramasy 3 myń metrlik estafetada 3-orynǵa kóterildi. Munda B.Vehov, D. Tájibaı, N.Qaıyrbekovke qosa batysqazaqstandyq Maqsat Ýálıýlla aıdynǵa shyqty.
Jastar arasyndaǵy dúnıejúzilik dodaǵa Batys Qazaqstan oblysynan Alına Ájiǵalıeva men Maqsat Ýálıýlla qatysyp, úsh qola, bir kúmiske qol sozdy. Batysqazaqstandyq sportshylardy Erhat Qubashev, Danabek Haıyrov jáne Maksım Lozovoı daıyndady.
Aıta ketelik, Alına Ájiǵalıeva 2005 jyly 8 qazanda Oral qalasynda dúnıege kelgen.
2023 jyly AQSh-tyń Leık-Plesıd qalasynda qysqy ýnıversıadada Qazaqstan quramasy sapynda aralas estafetada kúmis júldege qol jetkizdi.
2024 jyly 6-8 jeltoqsanda Beıjiń qalasynda ótken Álemdik týrda Qazaqstan tarıhynda alǵash ret áıelder quramasy 3 myń metrlik estafetada úshinshi orynǵa ıe boldy. Qola medaldar alǵandar arasynda A.Ájiǵalıeva da bar.
Bıyl qańtarda Italııanyń Týrın qalasynda qysqy ýnıversıadada quramynda A.Ájiǵalıeva bar Qazaqstan quramasy 2 myń metrlik qashyqtyqta aralas synda úzdik úshtikten kórindi.
Alına Ájiǵalıeva Oral qalasyndaǵy Batys Qazaqstan ınnovatsııalyq-tehnologııalyq ýnıversıtetiniń úshinshi kýrsynda oqıdy.
Eske sala keteıik, budan buryn short-trek sheberleri jańa jetistikterge jete ala ma, sony jazǵan bolatynbyz.
Short-trekten Qazaqstan quramasy Álemdik týrda úzdik úshtikke ilikti.
Qysqy ýnıversıadada Qazaqstan quramasy short-trekten qola júldeni jeńip aldy.