Olımpıadadan elge oralǵan short-trekshi Abzal Ájiǵalıev aldaǵy josparlaryn aıtty
ASTANA. KAZINFORM — 2026 jylǵy XXV qysqy Olımpıada oıyndarynda el namysyn qorǵaǵan otandasymyz, short-trekshi Abzal Ájiǵalıev elge oraldy. Astana áýejaıynda ony sport qaýymdastyǵynyń ókilderi, jankúıerler men jýrnalıster qarsy aldy dep habarlaıdy Kazinform tilshisi.
Olımpıadada A.Ájiǵalıev short-trek boıynsha Qazaqstannyń namysyn qorǵap, tórtjyldyqtyń basty dodasynda joǵary deńgeıdegi daıyndyq kórsetti. Bul sportshy úshin tórtinshi Olımpıada boldy jáne osy joly ol shırek fınalǵa deıin jetti. Qazaqstandyqtardy tolǵandyrǵan basty suraq — Ájiǵalıev besinshi Olımpıadaǵa daıyndyqty jalǵastyra ma degen másele.
— Ázirge bul suraqqa naqty jaýap bere almaımyn, aldaǵy josparlardy quryp, maqsattarymyzǵa qaraı qadam basamyz, — dedi ol.
Sportshy óziniń jarystardaǵy óneri balalardy short-trekpen aınalysýǵa shabyttandyrady degen úmitin bildirdi. Onyń aıtýynsha, bul sport túri kúrdeli bolǵanymen, óte ádemi ári tartymdy, sondaı-aq tek fızıkalyq emes, moraldyq tózimdilikti de talap etedi.
Eger onyń úlgisi kem degende birneshe jasóspirimdi osy sportqa qyzyqtyrsa, onda jyldar boıy jasaǵan jattyǵýlar men eń iri týrnırlerge qatysýynyń tekke ketpegeni. Abzal Ájiǵalıev sondaı-aq Qazaqstanda short-trektiń odan ári damyp, jastar arasynda qyzyǵýshylyqtyń arta túsetinine senim bildirdi.
Eske sala ketsek, buǵan deıin Qazaqstannyń taǵy bir short-trekshi Denıs Nıkısha 2026 jylǵy Olımpıada oıyndarynda jetinshi oryn aldy.