Short-trek: Japonııada jaqsy nátıjege qol jetkizgimiz keledi – Mádiǵalı Qarsybekov
ORAL. QazAqparat – Short-trekten Qazaqstan quramasy 29 qarasha – 1 jeltoqsan aralyǵynda Nagoıada (Japonııa) ótetin álem kýbogynyń úshinshi kezeńine qatysady, dep habarlaıdy QazAqparat tilshisi.
Qazaqstan quramasynyń bas bapkeri Mádiǵalı Qarsybekovtiń aıtýynsha, Japonııada erlerden 6, áıelderden 2 shorttrekshi el namysyn qorǵamaqshy.
Atap aıtqanda, Abzal Ájiǵalıev, Nurbergen Jumaǵazıev, Mersaıd Jaqsybaev, Ádil Ǵalıahmetov, Nurtilek Qajyǵalı jáne Erkebulan Shamýhanov jarys jolyna shyǵady. Qyzdardan Olga Tıhonova men Alena Volkovıtskaıa synǵa túsedi.
«Abzal Ájiǵalıev pen Erekbulan Shamýhanov jaqsy nátıje kórsete me dep oılaımyz. Múmkin, erler quramasy 5 myń metrlik estafetada kózge túsip qalar. Qyzdardan Tıhonova men Volkovıtskaıany álem chempıonatyna reıtıngtik upaı jınaý úshin jáne aralas estafetaǵa aldyq. Anastasııa Krestova men Álııa Kım jaraqattaryn emdep jatyr», dedi QazAqparat tilshisine Qazaqstannyń eńbek sińirgen jattyqtyrýshysy M.Qarsybekov.
Sodan keıin 6-8 jeltoqsan aralyǵynda Shanhaı qalasynda álem kýbogynyń tórtinshi kezeńi ótedi. Qazaqstandyqtar onda da baq synamaqshy.
Bıyl AQSh-ta ótken álem kýbogy kezeńinde Abzal Ájiǵalıevtiń 500 metr qashyqtyqta qola júldeger atanǵany belgili.
