Short-trek sheberi Abzal Ájiǵalıev sportshy retinde mansabyn aıaqtady
ORAL. KAZINFORM – Batys Qazaqstan oblysynan túlep ushyp, short-trekten tórt Olımpıada oıyndaryna qatysqan Abzal Ájiǵalıev sportshy retinde mansabyn aıaqtaıtynyn málimdedi.
Sportshynyń ózi Facebook áleýmettik jelisindegi paraqshasynda málim etkenindeı, Abzal short-trekpen alǵash ret 24 jyl buryn tanysty. Sol kúnnen bastap bul sport túri ómiriniń ajyramas bóligine aınaldy. Al 2009 jyldan bastap Qazaqstan ulttyq quramasynyń sapynda el namysyn qorǵaý baqyty buıyrdy.
- Osy jyldar ishinde búkil qashyqtyqta Qazaqstan chempıony atana aldym. Elimizdiń tarıhyndaǵy alǵashqy álem kýbogynyń altyn medalin jeńip alyp, halyqaralyq jarystarda talaı ret jeńis tuǵyryna kóterildim. Tórt Olımpıada oıyndaryna qatysyp, eki márte Qazaqstan Týyn Olımpıada arenasyna alyp shyǵý qurmetine ıe boldym. Men úshin bul - eń úlken mártebe, - dep jazdy Abzal.
Budan keıin ol bıyl kásibı sportshy retindegi mansabyn aıaqtaý týraly sheshim qabyldaǵanyn jetkizdi.
- Aldaǵy maqsatym – osy jyldar boıy jınaǵan tájirıbem men bilimimdi Qazaqstan sportynyń damýyna arnaý. Ulttyq quramanyń janynan tabylyp, jas sportshylarǵa baǵyt-baǵdar berip, Qazaqstan short-treginiń bolashaǵy úshin eńbek etýdi ózimniń azamattyq ári sport aldyndaǵy paryzym dep bilemin. Men úshin eń mańyzdysy – kelesi býynnyń budan da bıik belesterdi baǵyndyrýy. Meniń sporttaǵy mıssııam aıaqtalǵan joq. Tek endi ol jańa deńgeıde jalǵasady, - dep qosty Abzal Ájiǵalıev.
A.Ájiǵalıev sporttyq jolynda 2016 jyly Solt-Leık-Sıtı qalasynda 500 metr qashyqtyqta qazaqstandyqtardan alǵash ret álem kýbogy kezeńiniń jeńimpazy atandy. Álemdik dodalarda budan basqa da baǵyndyrǵan bıikteri jeterlik.
Eske sala keteıik, budan buryn qazaqstandyq shorttrekshiniń álem kýbogy kezeńiniń jeńimpazy atanǵanyn jazǵan edik.
Sondaı-aq Abzal Ájiǵalıev ózine muz jáne jyldamdyq óte unaıtynyn aıtty.
