Short-trek: Medalǵa jaqyndap kelemiz
ASTANA. QazAQparat - Belarýs astanasy Mınsk qalasynda short-trek sportynan Álem kýbogynyń sońǵy altynshy kezeńinde qazaqstandyq short-trekshiler irikteýden súrinbeı ótti, dep habarlaıdy QazAqparat tilshisi.
Keshe irikteý saıystary ótti. Alǵashqy kúni erler men áıelder 1000 m, 1500 m, 500 m, 1000(2) m jáne estafeta saıystary boıynsha irikteýde baq synady.
500 metrge qatysqan úsh sportshymyz da fınaldyq kezeńderge joldama aldy. Óz tobynda Abzal Ájiǵalıev, Denıs Nıkısha jáne Aıdar Bekjanovtar úzdik shyǵyp, jalpy esepte kósh bastady.
1000 metrde de úsh birdeı sportshymyz (Nurbergen Jumaǵazıev, Abzal Ájiǵalıev, Denız Nıkısha) júldege talasatyn bolady.
Ókinishke oraı 1500 metrde sportshylarymyz irikteýden óte almady. Bul synǵa ulttyq qurama bapkerleri jastardy qosýdy jón sanapty. Odan bólek erler quramasy estafetada irikteýden sátti ótti.
Qyzdarymyz joǵaryda atalǵan qashyqtyqtar arasynan tek 1000 metrde ǵana jaqsy nátıje kórsete aldy. Krestova Anastasııa men Kım Iong kelesi kezeńge ótti. Estafetada quramamyz óz tobynda úshinshi oryn alyp, kelesi kezeńge shyǵa almady.
Keshe habarlaǵanymyzdaı bas bapker Qarsybekov: «Almatyda ótken Ýnıversıada oıyndarynda 1 kúmis jáne 3 qola medalmen shekteldik. Maqsatymyz bir altyn edi. Ókinishke qaraı sáttilik joldas bolmady. Endi osy álem kýbogynda bar kúsh-jigerimizdi jumsap, altyn alýǵa tyrysamyz», - dep atap ótken bolatyn.
