Short-trek: álem chempıonatyna baratyn Qazaqstan quramasy anyqtaldy
ORAL. QazAqparat - 8-10 naýryzda Sofııa qalasynda short-trekten ótetin álem chempıonatyna baratyn Qazaqstan quramasy anyqtaldy, dep habarlaıdy QazAqparat tilshisi.
El quramasynyń bas bapkeri, Qazaqstannyń eńbek sińirgen jattyqtyrýshysy Mádiǵalı Qarsybekovtiń aıtýynsha, álem kýbogy kezeńderiniń qorytyndysy boıynsha qazaqstandyqtar tórt lıtsenzııaǵa ıe boldy.
Atap aıtqanda, kópsaıystan 1500, 500 jáne 1000 metr qashyqtyqta erlerden Nurbergen Jumaǵazıev pen Ádil Ǵalıahmetov jarys jolyna shyǵady. Áıelderden osy synda Álııa Kım men Anastasııa Krestovanyń qaısysy jaqsy daıyn bolsa, soǵan múmkindik beriledi.
Sonymen qatar quramynda Álııa Kım, Anastasııa Krestova, Olga Tıhonova jáne Ásel Taıshymanova bar tórttik 3 myń metrlik estafetada baq synaıdy.
«17 aqpannan Máskeýde oqý-jattyǵý jıynyn ótkizemiz. Sodan keıin 3 naýryzda Sofııaǵa attanamyz», dedi QazAqparat tilshisine M.Qarsybekov.
Eske sala keteıik, Mádiǵalı Qarsybekov Oralda jabyq muz aıdyny ashylǵannan keıin 2002 jyly osynda kelip, bolashaǵynan úmit kúttiretin shorttrekshilerdi iriktep, daıyndaǵan bolatyn. Sonyń nátıjesinde Qazaqstannan alǵash ret Olımpıadaǵa qatysqan Aıdar Bekjanov, álem kýbogy kezeńderiniń jeńimpazy atanǵan Abzal Ájiǵalıev, Nurbergen Jumaǵazıev syndy tanymal sportshylar tárbıelendi. Endi olardyń ornyn Ádil Ǵalıahmetov, Nurtilek Qajyǵalı syndy jastar basyp keledi.
M.Qarsybekov 2011 jyly Astanaǵa kóshkennen keıin onyń isin Qazaqstannyń eńbek sińirgen jattyqtyrýshysy Maksım Lozovoı bastaǵan mamandar jalǵastyrýda.
