Short-trek: Abzal Ájiǵalıev álem kýbogy kezeńiniń júldegeri atandy
NUR-SULTAN. QazAqparat – Qazaqstandyq Abzal Ájiǵalıev Dordreht qalasynda short-trekten álem kýbogy kezeńinde qola júldeger atandy, dep habarlaıdy QazAqparat.
Ulttyq olımpıada komıteti málim etkenindeı, Abzal 500 metr qashyqtyqta úzdik úshtikke ilikti.
Bul qashyqtyqta ońtústikkoreıalyq Se Djýn Lý altyn medaldi jeńip aldy. Belgııalyq Stıın Desmet kúmis júldege ıe boldy.
Short-trekten Qazaqstan quramasynyń bas bapkeri Mádiǵalı Qarsybekov qazirgi kezde komandanyń aldaǵy naýryz aıynyń ortasynda Seýl qalasynda ótetin álem chempıonatyna daıyndalyp jatqandyǵyn jetkizdi.
«Bıylǵy maýsymda jastardan Nurtilek Qajyǵalı, Ádil Ǵalıahmetov, Erkebulan Shamýhanov, Mersaıd Jaqsybaevtardy qosyp, shama-sharqyn baıqap jatyrmyz. Burynǵy quramnan Abzal Ájiǵalıev pen Denıs Nıkısha qaldy. Barlyǵy 8-9 shorttrekshimizdi shyńdaý ústindemiz. Aldaǵy jyly qyrkúıekten bastap tórt birdeı álem kýbogy kezeńi ótip, olımpıadaǵa lızentsııalar sarapqa salynady. Maqsat - 2022 jylǵy Beıjiń olımpıadasyna qatysý úshin joldamalardy barynsha kóbirek jeńip alý», - dedi QazAqparat tilshisine M.Qarsybekov.
Aıta ketsek, Batys Qazaqstan oblysynda týyp-ósken Abzal Ájiǵalıev keıingi jyldary Nur-Sultan qalasynyń atynan el namysyn qorǵap keledi.
