Shóptiń janýynan bastalǵan órt Semeı ormanyna jetti

ASTANA. KAZINFORM — Búgin kúndiz Abaı oblysynyń Besqaraǵaı aýdany Ernazar aýyldyq okrýginiń Qoıanbaı aýylynda qurǵaq shóptiń janýy oryn aldy.

TJM taratqan derekke qaraǵanda, 18 m/s deıingi ekpindi jel órttiń tez taralýyna yqpal etti. 

Dala órti ishinara QR Ekologııa jáne tabıǵı resýrstar mınıstrliginiń «Semeı ormany» MOTR Morozov fılıalynyń orman alqabyna ótti.

Tótenshe jaǵdaılar mınıstri Shyńǵys Árinovtyń tapsyrmasy boıynsha órt ornyndaǵy qutqarýshylar toby «Semeı ormany» bólimshelerin qoldaý jáne órtti jedel joıý úshin kúsheıtildi.

Jumysty úılestirýdi TJM Komandalyq ortalyǵy, jedel shtabty vıtse-mınıstr Batyrbek Ábdishev basqarýda. Órt ornyna órt sóndirý qyzmeti komıtetiniń tóraǵasy Erlan Tóregeldıev dereý shyqty.

- Jalyndy sóndirýge Abaı oblysy, Pavlodar oblysy TJD, «Semeı ormany» jáne «Ertis ormany» sharýashylyqtarynyń kúshteri men quraldary, sondaı-aq jergilikti atqarýshy organdar jumyldyryldy. Barlyǵy 240 adam jáne 96 tehnıka tartyldy. Oblystyń TJD bastyǵy Manarbek Shapaǵatovtyń qatysýymen áýeden barlaý júrgizilýde, - delingen aqparatta.

TJM órttiń odan ári taralýyn boldyrmaý úshin Ekologııa mınıstrligine otpen kúreste jan-jaqty kómek kórsetýde. Eldi mekenderge qaýip joq. Jaǵdaı únemi baqylaýda.

Buǵan deıin Baıanaýylda ulttyq parkke qarasty jerler órtenip jatqany habarlandy.

Artynsha mınıstrlik Baıanaýyldaǵy dala órtine qatysty málimdeme jasaǵan bolatyn.