Shopannyń vagonynan esirtki men qarý-jaraq tabyldy – Jambyl oblysy
TARAZ. QazAqparat – Jambyldyq polıtseıler «Qarý» jedel-aldyn alý sharasy barysynda shopannyń vagonynan esirtki, qarý-jaraq pen Qyzyl kitapqa engen janýardyń etin tapty, dep habarlaıdy QazAqparat tilshisi.
Moıynqum aýdanynyń qumǵa jaqyn mańdaǵy mal jaıylymy aýmaǵynda jedel-izdestirý sharasyn júrgizý barysynda qoıshy bolyp jumys isteıtin 34 jastaǵy jergilikti turǵynnyń shaǵyn vagonynan jalpy salmaǵy 1 keli 310 gramm keptirilgen marıhýana tabylyp, tárkilendi.
«Tekseris barysynda vagonnan tirkelmegen 5 ańshy myltyǵy, 56 ańshylyq patron, sondaı-aq el aýmaǵynda aýlaýǵa tyıym salynǵan qaraquıryq janýarynyń eti men basy tabyldy. Atalǵan derekke qatysty QR QK 296-baby 4-bóliginiń (asa iri mólsherde esirtki zattaryn zańsyz saqtaý) jáne QR QK 337-baby 4-bóliginiń (zańsyz ań aýlaý) boıynsha sotqa deıingi tergeý amaldary bastaldy», - dedi oblystyq Polıtsııa departamentiniń baspasóz qyzmetinen.
Qazirgi tańda ustalǵan azamat óz kinásin tolyq moıyndaǵan. Aıta keteıik, zańda esirtki quraldaryn asa iri mólsherde zańsyz saqtaǵany úshin 3 jylǵa deıin, zańsyz ań aýlaǵany úshin 3 jyldan 7 jylǵa deıin bas bostandyǵynan aıyrý jazasy kózdelgen.
