Shopandardyń balalaryn áskerge shaqyrtýdy keıingi qaldyrý usynysy jasaldy
ASTANA. KAZINFORM — Shopandardyń balalaryn áskerge shaqyrtýdy keıingi qaldyrý usynysy Qorǵanys mınıstrligimen birlese pysyqtalady. Bul týraly QR Aýyl sharýashylyǵy vıtse-mınıstri Amanǵalı Berdalın málim etti.
— Jumys istep júrgen baqtashylar men shopandardyń balalaryn áskerı (merzimdi) qyzmetke shaqyrýdy keıingi qaldyrý máselesin qarastyrý usynylady. Sonymen qatar, áleýmettik jaǵdaılar qalyptastyrý bóliginde Eńbek jáne halyqty áleýmettik qorǵaý mınıstrligimen birlesip baqtashylar men shopandardyń 55 jasqa tolǵanda arnaıy áleýmettik tólem alýy quqyǵyn qamtamasyz etý máselesi pysyqtalyp jatyr. Osy maqsatta Eńbek mınıstrliginiń buıryǵyna tolyqtyrý engizý usynylady, — dedi A. Berdalın Senatta mal sharýashylyǵyn damytý perspektıvalaryn talqylaý kezinde.
Senattaǵy baspasóz máslıhatynda tilshiler suraǵyna jaýap berý kezinde vıtse-mınıstr bul usynys shopandardyń balalaryn múldem áskerge shaqyrtpaýdy bildirmeıtinin naqtylady.
— Bul turǵyda shaqyrtý merzimin keıinge qaldyrýdy aıtyp otyrmyz. Máselen, elde áýletimen mal sharýashylyǵynda jumys istep júrgender bar. Olardyń arasynda joǵary nátıje kórsetip jatqandary da barshylyq. Sharýashylyqtaǵy qarbalas kezeńinde ákelerine balalarynyń kómegi kerek bolady. Sondyqtan mal sharýashylyǵynyń damýy baǵytynda áskerge shaqyrtý merzimin keıingi qaldyrý usynysy jasaldy. Osynyń bárin Qorǵanys mınıstrligimen birlese pysyqtaý kerek, — dedi Amanǵalı Berdalın.
Eske salsaq, jaqynda Úkimet Mal sharýashylyǵyn damytýdyń 2026-2030 jyldarǵa arnalǵan keshendi josparynyń jobasyn maquldady. Keshendi jospardy júzege asyrý iri qara mal sanyn 7,9 mln-nan 12 mln basqa jáne usaq mal sanyn 20,2 mln-nan 28 mln basqa deıin ulǵaıtýdy kózdeıdi.
Munymen qosa, keshendi jospardyń jobasynda salany kadrlarmen qamtamasyz etý, mal sharýashylyǵy qyzmetkerleri úshin áleýmettik jaǵdaılar jasaý, onyń ishinde shopandar men qoıshylardyń 55 jasqa tolǵannan keıin arnaıy áleýmettik tólemder alý quqyǵyn qamtamasyz etý, mamandar úshin turǵyn úı qurylysyn salý jáne taǵy da basqa sharalar kózdelgen.
Osyǵan deıin elde qoıshylar men baqtashylardyń zeınet jasyn tómendetý múmkindigi aıtylǵan edi.
Budan buryn habarlanǵandaı, merzimdi áskerı qyzmettegi azamattar endi kredıt ala almaıdy.