Shopandarda elektr jaryǵy da joq – sarapshy aýyl sharýashylyǵyn sýbsıdııalaý jaıynda

NUR-SULTAN. QazAqparat – Prezıdent jastar kadr rezerviniń úzdik ondyǵyna kirgen Ánýar Nurtazın Memleket basshysynyń aýyl sharýashylyǵyndaǵy jemqorlyqqa qatysty aıtqan málimdemesine oraı pikir bildirdi, dep habarlaıdy QazAqparat tilshisi.

Onyń paıymynsha, aýyl sharýashylyǵy memlekettik azyq-túlik qaýipsizdiginiń, turaqtylyǵynyń, tipti tutastyǵynyń kepili sanalady.

Sonymen qatar ol halyqty barynsha jumyspen qamtyp otyr. Osy rette fermelerlik degenimiz iri agroholdıngten bastap jeke sharýa qojalyqqa deıingi 4 bazalyq qurylymdy bildiretindigin atap ótken jón.

Biraq, memleket tarapynan qarastyrylǵan aýyl sharýashylyǵyn qoldaý sýbsıdııasyn negizinen iri holdıngter alyp otyr.

«Bul oraıda biz úshin shaǵyn sharýashylyqtardy nemese tipti kishkentaı sharýashylyqtardy qoldaý barynsha tıimdi ekendigin túsiný óte mańyzdy. Olar osy ýaqytqa deıin múldem eshqandaı sýbsıdııa almady desek te bolady. Bul Internettiń, ІT-tehnologııalardyń dendep enýimen de baılanysty. ІT-salada ázirlenetin barlyq júıeniń kúrdeli ekendigin, aýtentıfıkatsııalaý, verıfıkatsııalaý jáne basqalaryn jasaýdy talap etetindigin túsinemiz. Al malyn qala úlgisindegi eldi mekennen 30-40 shaqyrym shalǵaıdaǵy jaılaýda ne qystaýda baǵyp júrgen shaǵyn fermeler jaıynda aıtar bolsaq, olarda ınternet nemese uıaly baılanys turmaq elektr jaryǵy da joq», - dedi ol.

Esterińizge sala keteıik, keshe Memleket basshysy Qasym-Jomart Toqaevtyń tóraǵalyǵymen Sybaılas jemqorlyqqa qarsy is-qımyl máseleleri jónindegi keńes ótti. Onda Prezıdent aýyl sharýashylyǵy salasynda beleń alǵan jemqorlyqty synady.

«Bul sala jyldar boıy jemqorlyqqa belsheden batyp otyr. Sonyń kesirinen memleket úlken zııan shekti, azyq-túlik qaýipsizdigine nuqsan keldi. Atap aıtqanda, jaıylymdyq jerlerdi sýlandyrýǵa bólingen 80 mıllıard teńgeniń teń jartysy maqsatqa saı jumsalmaǵan. Byltyr qýańshylyq bolǵan kezde sharýalar jem-shóp tappaı, mal qyrylyp qaldy. Tipti, keıbir óńirde sharýalarǵa sýbsıdııa retinde kún batareıasy berilgen. Ashyǵyn aıtqanda, bul batareıalar aýyl turǵyndaryna ne qajet ekenine eshkim bas qatyrmaǵan. Sýbsıdııany ıgerdik dep esep berý úshin sol kún batareıalarynyń baǵasy eselep kórsetilgen. Munyń bári ýákiletti organdardyń jaýapsyzdyǵynan bolǵan. Tipti, keıde memlekettik organdardyń ózderi tikeleı aralasyp, zańsyz áreket jasaǵa», - degen edi QR Prezıdenti.