Shonjydaǵy saýyqtyrý ortalyǵynyń qıraý sebebi belgili boldy
ALMATY. QazAqparat - Qazaq qurylys jáne sáýlet ǵylymı-zertteý jáne jobalaý ınstıtýtynyń mamandary Shonjydaǵy dene shynyqtyrý jáne saýyqtyrý ortalyǵynyń qıraýynyń aldyn ala sebebin jarııalady, dep habarlaıdy QazAqparat tilshisi.
Qurylys jáne turǵyn úı-kommýnaldyq sharýashylyq isteri komıtetiniń tapsyrmasymen oqıǵa ornyna Qazaq qurylys jáne sáýlet ǵylymı-zertteý jáne jobalaý ınstıtýtynyń mamandary issaparmen jiberilgen bolatyn.
Mamandar Uıǵyr aýdanynyń Shonjy aýylyndaǵy qulaǵan dene shynyqtyrý-saýyqtyrý keshenin jedel tekserýdi aıaqtady.
Onyń nátıjesi boıynsha apat «9» jáne «10» osteri boıynsha fermalarda bastalǵany anyqtaldy. Tsement-qum quıyndysy belgilengen jobalyq mólsherinen asyp ketken. Sondaı-aq, jartylaı fermalardyń joǵarǵy jáne tómengi beldikteriniń qosylystarynyń montajdyq túıinderi ár túrli kólemdegi alty burandamamen bekitilgen. Bul da jobadan aýytqý bolyp sanalady.
Tik júkteme kezinde fermalardyń montajdyq túıinderi tarala bastady, bul bir burandamanyń buzylýyna jáne kóldeneń júktemelerdiń fermalardan baǵandarǵa berilýine jáne 3-blok konstrýktsııalarynyń birtindep qulaýyna ákelgen.
Osylaısha, 3-bloktaǵy apattyń sebepteriniń biri - bekitilgen jobalaý sheshimderinen aýytqýy dep aıtýǵa bolady.
Komıtet Almaty oblysynyń ákimdigine QR qoldanystaǵy zańnamasynyń buzylýyna jol bergen tulǵalardy (merdiger, tehnıkalyq jáne avtorlyq qadaǵalaý) jaýapkershilikke tartý týraly hat joldady.
Sonymen qatar, jobalaý qujattamasynda baǵandarmen qosylý túıinderi keltirilmegen jáne fermalardyń tirek taǵandarynyń qurylymy sıpattalmaǵan. 2-blokqa janasatyn jerde 3-blok jabynynyń deńgeıinde deformatsııalyq jikterdi ornatý boıynsha sheshim shyǵarylmaǵan. Osyǵan baılanysty jobalyq qateler aıqyndaldy.
Apattyń sebepteri týraly túpkilikti tujyrymdar bloktyń tirek konstrýktsııalarynyń elementterinen iriktep alynǵan úlgilerdi esepteý jáne zerthanalyq synaý nátıjeleri negizinde jasalady.
Aıta ketý kerek, 21 qyrkúıekte Shonjy aýylyndaǵy dene shynyqtyrý-saýyqtyrý kesheniniń úshinshi blogynyń jumsaq jabynyn ornatý jumystary kezinde metall konstrýktsııalary qulaǵan bolatyn.
Qulaǵan bloktyń aýdany - 1058,4 sharshy metr. Bul ǵımarattyń birinshi jáne ekinshi bloktaryna áser etken joq. Qaza bolǵandar men zardap shekkender joq.
