Shomylýǵa ruqsat etilgen oryndar tizimin biryńǵaı platformadan bilýge bolady

NUR-SULTAN. QazAqparat – Qazaqstandyqtar shomylýǵa ruqsat berilgen nemese tyıym salynǵan sý aıdyndary týraly derekti biryńǵaı platformadan bile alady. Bul týraly QR TJM Azamattyq qorǵanys jáne áskerı bólimder komıtetiniń basqarma basshysy Qanat Turysbaev málim etti, dep habarlaıdy QazAqparat tilshisi.

«Bıyl sý aıdyndarynda adam óliminiń aldyn alýdyń jańa ádisterin qolǵa aldyq. Atap aıtsaq, avıatsııalyq jáne temirjol kóliginiń mýltımedııalyq jabdyqtary sý qaýipsizdigi erejesi jazylǵan úgit-nasıhat paraqshalaryn taratýda paıdalanyldy. Sonymen qatar 2GIS kartografııa platformasynda elimizdiń barlyq óńirlerinde shomylýǵa ruqsat etilgen nemese tyıym salynǵan sý aıdyndary týraly derekter ornalastyryldy. Odan bólek, jeke bas qaýipsizdigi taqyrybynda oqýshylarmen 1 129 ınteraktıvti sabaq jáne halyqpen 5 507 jıyn ótkizildi», - dedi Qanat Turysbaev OKQ-de ótken baspasóz máslıhatynda.

Buǵan deıin basqarma basshysy elimizde balalardyń sýdaǵy qaýipsizdigin qamtý maqsatynda olardy júzýge úıretý qolǵa alynǵanyn aıtty.

Odan bólek, Q. Turysbaev balalardyń sýǵa ketýine qatysty qaıǵyly oqıǵalardyń 82 paıyzynda ata-anasy qaraýsyz qaldyrǵan dep málimdedi.