Shomylý maýsymy kezinde 266 adam sýǵa ketti - Bekker
NUR-SULTAN. QazAqparat – Maýsym-tamyz aılaryndaǵy shomylý maýsymynda Qazaqstanda 266 adam sýǵa ketip, kóz jumdy. Bul týraly elordada ótken baspasóz máslıhatynda QR ІІM Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat tilshisi.
«1 qyrkúıekte Qazaqstanda sýǵa túsý maýsymy resmı túrde aıaqtaldy. Adamdardyń qaýipsizdigin qamtamasyz etý maqsatynda TJK polıtsııamen jáne jergilikti atqarýshy organdarmen birlesip, uıymdastyrý jáne praktıkalyq is-sharalar keshenin júrgizdi. Qabyldanǵan sharalarǵa qaramastan, shomylý maýsymy kezinde (maýsym-tamyz) elimizdiń sý aıdyndarynda 266 adam kóz jumdy. Onyń 87-si – balalar», - dedi Vladımır Bekker.
Komıtet tóraǵasynyń aıtýynsha, adamdardyń sýǵa ketýiniń negizgi sebepteriniń biri – jabdyqtalmaǵan sý aıdynynda shomylý. Úsh aıdyń ishinde 242 adam osy sebeptiń saldarynan kóz jumǵan. Balalardy eresekterdiń qaraýynsyz qaldyrý sebebi boıynsha 24 bala sýǵa ketse, mas kúıindegi 23 adam ajal qushqan.
«Shomylý maýsymy bastalǵaly beri jedel-qutqarý jasaǵynyń qutqarýshylary 269 adamdy, onyń ishinde 85 balany qutqardy. Sonymen birge, balyq aýlaý kezinde adamdardyń kóz jumý jaǵdaılary da tirkeldi. Máselen, úsh aıdyń ishinde 39 balyqshy sýǵa ketken. Qaıǵyly jaǵdaılarǵa negizinen qaýipsizdik erejelerin buzý, jeke qutqarý quraldarynsyz sý aıdynyna shyǵyp ketý sebep bolyp otyr», - deıdi ol.
Sýǵa ketý jaǵdaılarynyń kóbi Almaty, Túrkistan, Shyǵys Qazaqstan, Pavlodar oblystarynda tirkelgen. Vladımır Bekker el aýmaǵynda 607 resmı sýǵa túsý jáne sý janynda demalý oryndary belgilengenin aıtady. 27 kommýnaldyq jaǵajaıdyń akvtorııalary ІІM TJK bólimsheleriniń baqylaýynda. Sondaı-aq, 53 mobıldik qutqarý beketterin qoıý arqyly sý aıdyndarynyń 113 qaýipti ýchaskesi baqylanady.
