Shomylý maýsymy bastalǵaly Qazaqstanda 164 adam sýǵa ketti
ASTANA. QazAqparat - Maýsym aıy bastalǵaly Qazaqstan aýmaǵynda 164 adam sýǵa ketti. Bul týraly búgin QR Tótenshe jaǵdaılar komıteti tóraǵasynyń orynbasary general-maıor Jasulan Jumashev málim etti.
«Qabyldanǵan sharalarǵa qaramastan, elimizdegi sý aıdyndarynda bıyldyń basynan 228 adam qaza bolsa, onyń ishinde 61-i bala. Al bıyl sýǵa shomylý maýsymy bastalǵaly (1 maýsymnan) Qazaqstandaǵy sý qoımalarynda 164 adam, olardyń arasynda 19 bala sýǵa ketken»,-dedi Jumashev.
Onyń sózine qaraǵanda, adamdar qaýipsizdik sharalaryn eskermegendikten, kóbinese ózenderde sýǵa ketýde.
Atap aıtqanda, 2015 jyldyń basynan beri qutqarý qyzmetteri sýda 393 adamdy ajaldan aman alyp qalǵan, onyń arasynda 110-y - balalar.
Adamdardyń sýda qaýipti jaǵdaıǵa tap bolýynyń negizgi sebepteri júze bilmeý, óz kúshin baǵalaı almaýy, mas kúıinde sýǵa shomylý, balalardy baqylaýsyz qaldyryp ketý, jeke qutqarý quraldarynsyz balyq aýlaý, sondaı-aq jabdyqtalmaǵan jerlerde sýǵa túsý sekildi qaýipsizdik qaǵıdalaryn óreskel buzý saldarynan jıirek oryn alýda.
Vedomstvo málimetinshe, qazirgi kezde sý qoımalary, ózender men kólderdiń mańynda ornalasqan balalardyń demalys lagerlerindegi qaýipsizdik erekshe nazarǵa alynyp otyr. Osy oraıda bilim berý, densaýlyq saqtaý, jergilikti atqarý organdarymen birlesken keshendi sharalar iske asyrylýda. Munymen qosa, adamdar kóp jınanalatyn jaǵajaılardaǵy qaýipsizdikti qamtamasyz etý úshin qutqarý bólimsheleriniń jeke quramdary daıyndaldy.
