Shomylý maýsymy bastalǵaly 75 bala kóz jumdy – TJK
NUR-SULTAN. QazAqparat – El aýmaǵynda sýǵa túsýge jabdyqtalǵan 607 resmı jaǵajaı bar. Bul týraly elordada ótken brıfıngte QR ІІM Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat tilshisi.
«Shilde aıy shomylý maýsymynyń naǵyz qyzǵan kezi. Ókinishke qaraı, sýda qaıǵyly jaǵdaılar tirkelýde. Elimizde sýǵa shomylyp, balyq aýlaıtyn 50 myńnan astam aýmaq bar. Solardyń negizinde 607 resmı jaǵajaı jasaqtalǵan», - dedi V. Bekker.
Onyń sózine qaraǵanda, shomylý maýsymy bastalǵaly beri 214 adam sýǵa batty. sonyń 75-i – balalar. Bul turǵyda 198 adam shomylýǵa arnalmaǵan jerde ajal qushqan.
TJK baspasóz qyzmetiniń málimetterine sáıkes, 173 jaǵdaıda adamnyń (onyń 54-i bala) kóz jumýyna shomylý kezinde álin durys baǵalamaýy sebep bolǵan.
Atalmysh qaıǵyly oqıǵalardyń kóbisi Túrkistan (25 adam), Almaty (24), Aqmola (21), Shyǵys Qazaqstan (20) jáne Pavlodar (18) oblystarynda tirkedi.
QR ІІM Tótenshe jaǵdaılar komıteti azamattardy sý aıdyndarynda qaýipsizdik erejelerin saqtaýǵa shaqyrady.
Demalys oryndarda sýǵa mas nemese esirtki qabyldaǵan kúıde túsýge; sýǵa qaıyqtan, kemelerden, bul maqsatqa arnalmaǵan zattardan sekirýge; belgiden ary asyp júzip ketýge; júzýge arnalmaǵan zattarmen júzýge; kemelerge jaqyndaýǵa; sý aıdyndaryn lastaýǵa; jaǵada jáne kıim aýystyratyn jerde demalýshylardy jaraqattaýy múmkin qoqysty tastaýǵa; jalǵan kómek surap, dabyl qaqpaýǵa; tehnıkalyq jáne eskertý belgilerine órmeleýge; úlken adamnyń qaraýynsyz balany sýǵa jiberýge; shomylyp jatqan balalardy qaraýsyz qaldyrýǵa tyıym salady.
