Shomylý erejesin buzǵan 242 adam ákimshilik jaýapkershilikke tartyldy

NUR-SULTAN. QazAqparat – Shomylý maýsymy bastalmaı turyp-aq ereje buzǵan 242 adam ákimshilik jaýapqa tartyldy. Bul týraly QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov aıtyp berdi, dep habarlaıdy QazAqparat tilshisi.

Spıkerdiń aıtýynsha, shomylý maýsymy 1 maýsymda resmı bastalady jáne 1 qyrkúıekke deıin sozylady. Biraq qazirdiń ózinde 200-den astam zań buzýshy anyqtalǵan.

«Sý aıdyndarynda adamdardyń qaıtys bolýyna jol bermeý úshin aldyn alý jumystary kúsheıip, demalý oryndarynda reıd júrgizý bastaldy. Jalpy 3500-den astam patrýldeý men reıd júrgizildi, oǵan Іshki ister jáne Tótenshe jaǵdaılar mınıstrlikterinen 8800-den astam qyzmetker tartylyp otyr. Nátıjesinde 242 zań buzýshy ákimshilik jaýapqa tartyldy», - dedi Baýyrjan Syzdyqov Ortalyq kommýnıkatsııalar qyzmetinde ótken brıfıngide.

Sonymen birge, komıtet tóraǵasy qandaı temperatýrada sýǵa túsýge bolatynyn aıtty.

«Ásirese ońtústikte aýa raıy ystyq bolyp tur, demalýǵa barǵan adamdar nemese balalar sýǵa túsýge qumar bolyp turady. Ázirge sýǵa túsýden bas tarta turý kerek. Sýǵa túsý úshin sý temperatýrasy 18 gradýstan joǵary, aýa temperatýrasy – 30 gradýstan asýy tıis. Sonda densaýlyǵyńyzǵa zııan kelmeıdi. Al sý 18 gradýstan tómen bolsa, sýyqtan tamyr tartylyp, bulshyqet túıilip qalýy múmkin. Ol da sýǵa batýdyń bir sebebi bolyp sanalady», - dep keńes berdi B. Syzdyqov.

Aıta keteıik, elimizde shomylýǵa ruqsat berilgen 469 oryn bar, onyń ishinde 118 kommýnaldyq jáne 275 jeke jaǵajaı belgilengen. Shomylýǵa ruqsat etilgen jáne tyıym salynǵan oryndar 2GIS kartasynda kórsetiledi.