Shómishbaı Sarıevtiń uıǵyr tilindegi jańa kitaby tanystyryldy

ALMATY. QazAqparat – Almatydaǵy Uıǵyr mýzykalyq komedııa teatrynda Shómishbaı Sarıevtiń uıǵyr tiline aýdarylǵan «Dýnıanı ashık kózdá qaratsam...» atty kitabynyń tusaýkeseri ótti, dep habarlaıdy QazAqparat BAQ.KZ-ke silteme jasap.

Saltanatty sharaǵa memleket jáne qoǵam qaıratkerleri, aqyn-jazýshylar, zııaly qaýym ókilderi, qazaq estradasynyń juldyzdary qatysty.

«Aǵa ómirden ótsede de, qaldyrǵan murasy elimizdiń ádebıetinde, án ónerinde, halyq jadynda máńgi saqtalady. Aǵa jaıly aıtylar sóz kóp. Keńes Dúısekeevpen jazǵan «Qaraǵym-aı» áni elimizdi álemge tanytyp, barsha halyq qosylyp shyrqaıtyn ánge aınaldy. Artyna qaldyrǵan murasyn nasıhattaý – barshamyzǵa paryz. Uıǵyr teatrynyń bastamasyna alǵysymyzdy bildiremiz. Men ózim Shómishbaı Sarıevtiń batasyn alǵan balanyń birimin. Stýdenttik shaǵymyzda ónerimizge sáttilik tilep, óziniń aq tilegin arnaǵan edi. Janashyrlyǵy barshamyzǵa ónege boldy», - dedi Mádenıet jáne sport vıtse-mınıstri Nurǵısa Dáýeshov.

Qazaqstannyń halyq ártisi Roza Rymbaeva aqyn Shómishbaı Sarıev HH jáne HHІ ǵasyrdaǵy qazaq poezııasyn joǵary kótergen tulǵalardyń biri ekenin aıtty.

«Bolmysy bólek bolatyn. Aqynnyń qalamynan týǵan óleńderi halyq jadynda máńgi saqtalady», - dedi R. Rymbaeva.

Aıta keteıik, teatrdaǵy tanystyrylym aıasynda Shómishbaı Naǵashybaıulynyń ómiri men shyǵarmashylyǵyna arnalǵan kitap kórmesi uıymdastyryldy.

Eske salsaq, elge eńbegi sińgen qaıratker Sh. Sarıev 2021 jyly aqpan aıynda dúnıeden ozdy.

2021 jyldyń kúzinde Astanada aqyn, ádebıettanýshy, ǵalym jáne Qazaqstanǵa eńbegi sińgen qaıratker Sh. Sarıevtiń «Júregim – qazaq eli» atty jańa týyndysynyń tusaýkeseri ótti.