Shomylýǵa arnalǵan úrlemeli ballondar qaýipti bolyp shyqty
ASTANA. KAZINFORM — Bıyl da sý aıdyndaryndaǵy qaýipsizdik sharalaryn kúsheıtý basty nazarda. Sebebi qaıǵyly jaǵdaılardyń basym bóligi áli de ruqsat etilmegen oryndarda shomylý, qaýipsizdik erejelerin elemeý jáne balalardy qaraýsyz qaldyrý saldarynan bolady. Bul týraly QR TJM Tótenshe jaǵdaılardy joıý departamenti bastyǵynyń orynbasary Jánibek Kárimbaev Jibek Joly telearnasynyń «Búgin Live» baǵdarlamasynda aıtty.
Onyń aıtýynsha, 1 maýsymnan bastap elimizde shomylý maýsymy resmı túrde ashyldy. Osyǵan oraı barlyq jaýapty mekemeler jumyldyrylyp, qaýipsizdikti qamtamasyz etý boıynsha keshendi daıyndyq jumystary qolǵa alynǵan.
— 1 maýsymnan bastap shomylý maýsymy ashyldy. Barlyq vedomstvolyq mekemeler jumylyp, daıyndyq júrgizildi. 733 shomylýǵa ruqsat etilgen oryn ashyldy, jaǵajaılardaǵy kemshilikter joıyldy. Bul jerlerde qaýipsizdikti qamtamasyz etetin mamandar bolady. TJM bastamasymen qutqarýshylar, súńgýirler, medıtsınalyq qyzmetkerler, sondaı-aq qoǵamdyq tártipti saqtaý úshin ІІM qyzmetkerleri jumyldyryldy. Qaýipsiz aımaqtar belgilenip, arnaıy taqtaıshalar ornatyldy. Reıdtik jáne patrýldik jumystar bastalyp, turǵyndarǵa qaýipsizdik erejeleri jazylǵan jadynamalar taratyldy, — dedi Jánibek Kárimbaev.
Mamannyń sózinshe, ruqsat etilgen jáne ruqsat etilmegen shomylý oryndary týraly aqparat 2GIS qosymshasyna engizilgen. Bul azamattarǵa qaýipsiz oryndardy aldyn ala anyqtaýǵa múmkindik beredi.
Onyń aıtýynsha, qaýipsizdik sharalarynyń mańyzyn qutqarý statıstıkasy da kórsetip otyr.
— Máselen, byltyr azamattyq qorǵaý organdarynyń qyzmetkerleri patrýldeý barysynda 276 adamdy, onyń ishinde 85 balany qutqardy, — dedi ol.
Osyǵan baılanysty mamandar sýǵa túser aldynda qaýipsizdik talaptaryn qatań saqtaýǵa shaqyrady. Eń aldymen jaǵajaı men sý aıdynynyń erekshelikterin zerttep, sýdyń tereńdigine mán bergen jón.
— Aqparattarǵa nazar aýdarý kerek. Sýdyń tereńdigin, jaǵajaıdy zerdelegen durys. Eskertý belgileri bar taqtaıshalardy elemeýge bolmaıdy, — dedi spıker.
Statıstıkaǵa sáıkes, qaıǵyly jaǵdaılardyń 95 paıyzy ruqsat etilmegen jerlerde tirkeledi. Sondyqtan mundaı aýmaqtarda baqylaý jumystary kúsheıtilgen.
— TJM buıryǵy negizinde jyljymaly posttar jumys isteıdi. Qazir el boıynsha 169 mobıldi post qyzmet kórsetip jatyr. Onyń sany aldaǵy ýaqytta ózgerýi múmkin. Olar kestege sáıkes tańǵy saǵat 8-9-dan keshki 22:00–ge deıin reıdtik sharalar júrgizedi, — dedi Jánibek Kárimbaev.
Spıker sondaı-aq ashyq sý aıdyndarynda úrlemeli quraldardy paıdalanýdyń qaýipti ekenin eske saldy. Onyń aıtýynsha, mundaı quraldar negizinen basseınderge arnalǵan jáne aǵys pen jeldiń áserinen adamdy qaýipke uryndyrýy múmkin.
Al sýǵa batyp bara jatqan adamdy kórgen jaǵdaıda eń aldymen 112 qyzmetine habarlasý qajet. Eger adam jaqsy júzip, jaqyn mańda qutqarý quraldary bolsa ǵana kómek kórsetýge bolady. Áıtpese, qutqarmaq bolǵan adamnyń ózi qaýipke tap bolýy múmkin.
