Shomylý maýsymynyń 9 kúninde 5 adam sýǵa ketken

ASTANA. KAZINFORM — Qazaqstanda shomylý maýsymy bastalǵannan beri 5 adam sýǵa ketken. Onyń bireýi jasóspirim. Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń basqarma bastyǵy Talǵat Jambaýov osyndaı derek keltirdi.

— Shomylý maýsymy bastalǵan 1 maýsymnan beri 5 adam tyıym salynǵan jerde sýǵa batyp ketti. Jalpy sýǵa batýdyń 95 paıyzy tyıym salynǵan jerde tirkeledi. Atalǵan 5 adamnyń bireýi 15 jastaǵy jasóspirim. Ol oqıǵa Astana qalasynda tirkeldi. Bul 1 maýsymnan bergi statıstıka. Al jyl basynan beri 19 adam sýǵa ketken. Onyń jeteýi bala, — dedi ol baspasóz máslıhatynda.

Aıtýynsha, shomylýǵa ruqsat etilmegen jerge shomylǵan azamat ta, shomylý uıymdastyrǵan adamdar da jaýapkershilikke tartylady.

— Ruqsat etilmegen jerde shomylǵan azamattarǵa Ákimshilik quqyq buzý týraly kodekstiń 412-baby boıynsha 7 aılyq eseptik kórsetkish (27 524teńge — red) mólsherinde aıyppul salynady. Al jabdyqtalmaǵan orynda shomylý uıymdastyrǵan sý aıdynynyń ıesiniń ústinen qylmystyq is qozǵalady. Onyń jazasyn Іshki ister mınıstrligi saralaıdy, — dedi Talǵat Jambaýov.

Buǵan deıin Pavlodar oblysynyń tótenshe jaǵdaılar departamenti de Aqkól aýylynda jasóspirimniń sýǵa ketkenin habarlaǵan bolatyn. Pavlodarda kanalǵa shomylýǵa barǵan jasóspirim sýǵa batyp ketti.