Shomylý maýsymy bastalǵaly 68 adam sýǵa batqan: prokýratýra turǵyndarǵa eskertý jasady
ASTANA. KAZINFORM- Tótenshe jaǵdaılar mınıstrliginiń málimetine sáıkes, sýǵa shomylý maýsymy bastalǵaly (1 maýsymnan beri) elimizdiń sý aıdyndarynda 68 adam, onyń ishinde 24 bala sýǵa batqan. Qutqarýshylardyń jedel áreketiniń arqasynda 90 adam, onyń ishinde 23 bala qutqaryldy.
Prokýrorlar ishki ister jáne tótenshe jaǵdaılar organdarymen birlesip, sý aıdyndaryndaǵy jappaı demalys oryndarynda reıdter ótkizdi, turǵyndarmen kezdesýler uıymdastyryp, jadynamalar men aqparattyq materıaldar taratýda, sondaı-aq buqaralyq aqparat quraldary men áleýmettik jeliler arqyly sýda qaýipsizdik qaǵıdalaryn túsindirý jumystaryn júrgizip jatyr.
Erekshe nazar azamattardy jabdyqtalmaǵan jerlerde shomylýdyń qaýiptiligi týraly eskertýge aýdarylyp otyr. Mundaı oryndarda qutqarý beketteri joq, sý túbi tekserilmegen. Sondyqtan tótenshe jaǵdaı týyndaǵan kezde der kezinde kómek kórsetý múmkin bolmaı qalýy yqtımal.
Sý jaǵasynda demalmas buryn shomylýǵa ruqsat etilgen oryndardyń tizimimen aldyn ala tanysý usynylady. Bul aqparat ákimdikter men Tótenshe jaǵdaılar mınıstrliginiń aýmaqtyq bólimsheleriniń resmı saıttarynda ornalastyrylǵan.
Azamattarǵa sýdaǵy qaýipsizdik qaǵıdalaryn buzǵany úshin kózdelgen jaýapkershilikte túsindirilip jatyr. Qazaqstan Respýblıkasy Qylmystyq kodeksiniń 306-babyna sáıkes qaýipsizdik talaptaryna saı kelmeıtin jumystardy oryndaý nemese qyzmetter kórsetý saldarynan adamnyń densaýlyǵyna zııan keltirilgen jaǵdaıda, 5 myń aılyq eseptik kórsetkishke deıingi mólsherde aıyppul salýdan bastap bes jylǵa deıin bas bostandyǵynan aıyrýǵa deıingi qylmystyq jaýaptylyq kózdelgen.
Sonymen qatar, Ákimshilik quqyq buzýshylyq týraly kodekstiń 127-babyna sáıkes ata-analar men zańdy ókilder kámeletke tolmaǵandardyń qaýipsizdigin qamtamasyz etý jónindegi mindetterin oryndamaǵany úshin ákimshilik jaýaptylyqqa tartylady. Atalǵan baptyń sanktsııasynda 10 aılyq eseptik kórsetkish mólsherinde aıyppul salýdan bastap 10 táýlikke deıin ákimshilik qamaqqa alý kózdelgen.
Profılaktıkalyq jumystar balalar arasynda da júrgizilip jatyr. Kezdesýler barysynda olarǵa sýdaǵy qaýipsizdik qaǵıdalary túsindirilip, eresekterdiń qaraýynsyz nemese tyıym salynǵan jerlerde shomylýdyń qaýiptiligi týraly aıtylady.
-Prokýratýra ata-analardy balalardy sý aıdyndarynyń janynda qaraýsyz qaldyrmaýǵa jáne demalys kezinde olardyń qaıda júrgenin únemi baqylaýda ustaýǵa shaqyrady. Esterińizde bolsyn: birneshe mınýttyq beıqamdyq orny tolmas qaıǵyly jaǵdaılarǵa ákelýi múmkin. Demalý úshin tek resmı túrde ruqsat etilgen ári jabdyqtalǵan shomylý oryndaryn tańdańyzdar, qaýipsizdik talaptaryn saqtańyzdar jáne ózderińiz ben jaqyndaryńyzdyń amandyǵyna qamqor bolyńyzdar,-delingen habarlamada.
Osyǵan deıin TJM shomylý maýsymynda sýdaǵy qaýipsizdik erejelerin saqtaýǵa shaqyrǵan bolatyn.
