Shomylý maýsymy bastalǵaly Qazaqstanda 68 adam sýǵa batyp kóz jumdy
ASTANA. KAZINFORM – Qazaqstanda shomylý maýsymy bastalǵaly 68 adam sýǵa batyp kóz jumdy. Onyń 24-i – bala. Qaıǵyly oqıǵalardyń 90 paıyzdan astamy shomylýǵa tyıym salynǵan ári arnaıy jabdyqtalmaǵan oryndarda tirkelgen. Bul týraly Tótenshe jaǵdaılar mınıstrligi Tótenshe jaǵdaılardy joıý departamentiniń bas mamany Saıan Toqymbaev málim etti.
Onyń aıtýynsha, sýǵa ketkenderdiń basym bóligi ruqsat etilmegen jerlerde shomylǵan.
– Eń kóp adam Mańǵystaý jáne Almaty oblystarynda sýǵa ketken – ár óńirde 9 adamnan. Túrkistan, Aqmola jáne Qostanaı oblystarynyń árqaısynda 5 adamnan kóz jumdy, – dedi Saıan Toqymbaev mınıstrlikte ótken brıfıngte.
Mınıstrlik ókiliniń sózinshe, adamdar qaýipsizdik talaptaryn elemeıdi jáne sýdyń qaýipti ekenin durys baǵalamaıdy. Ásirese balalardy qaraýsyz qaldyrý óte qaýipti.
Sondyqtan mınıstrlik aldyn alý jumystaryn kúsheıtip jatyr. Jyl basynan beri 24 myńǵa jýyq balaǵa júzý úıretildi. Sonymen qatar halyqqa 166 myńǵa jýyq jadynama men paraqsha taratylyp, sý jaǵasyna 1 403 qaýipsizdik belgisi qoıyldy.
TJM sýdaǵy qaýipsizdik erejesin buzǵandarǵa aıyppul salynatynyn eskertti. Ákimshilik quqyq buzýshylyq týraly kodekstiń 412-babyna sáıkes, mundaı quqyq buzýshylyq úshin 7 aılyq eseptik kórsetkish (shamamen 28 myń teńge) kóleminde aıyppul salynady.
Mınıstrliktiń málimetinshe, shomylý maýsymy bastalǵaly 1,5 myńnan astam adam jaýapkershilikke tartylǵan.
– Sýǵa batý oqıǵalarynyń 90 paıyzdan astamy dál osyndaı tyıym salynǵan ári jabdyqtalmaǵan jerlerde bolady. Sondyqtan mundaı oryndarda shomylýǵa bolmaıdy. Reıd kezinde zań buzýshylyqtar arnaıy kamera arqyly tirkelip, keıin ákimshilik hattama toltyrylady. Tájirıbe kórsetkendeı, mundaı sharalar qaıtalanatyn quqyq buzýshylyqtardyń azaıýyna kómektesedi, – dedi Saıan Toqymbaev.
Ol qaýipsizdik talaptaryna sáıkes túngi ýaqytta shomylýǵa tyıym salynǵanyn eske saldy.
– Sý aıdyndaryndaǵy jaǵdaıdy baqylaý úshin departament qyzmetkerleri eki ushqyshsyz ushý apparatyn paıdalanady. Shomylý maýsymy bastalǵaly qutqarýshylar 90 adamdy, onyń ishinde 23 balany aman alyp qaldy, – dedi ol.
Mınıstrlik sý jaǵasynda demalǵan kezde mynadaı qaýipsizdik talaptaryn saqtaýǵa shaqyrady:
· balalardy qaraýsyz qaldyrmaý;
· shomylýǵa bolmaıtyn jerlerde sýǵa túspeý;
· mas kúıde sýǵa túspeý;
· belgilengen jerden alysqa júzbeý;
· qaıyqtar men basqa da júzý quraldaryna jaqyndamaý;
· tekserilmegen jerde sýǵa súńgimeý;
· júzýge arnalmaǵan zattardy paıdalanbaý;
· qaýipti jerlerden sýǵa sekirmeý.
Aıta keteıik, buǵan deıin Mańǵystaý oblysynda Kaspıı teńiziniń shomylýǵa arnalmaǵan jaǵalaý bóliginde eki adamnyń sýǵa batyp ketkeni habarlanǵan edi.
