Shomylý maýsymy bastalǵaly beri 69 bala sýǵa batyp qaza tapty - ІІM
ASTANA. KAZINFORM – Іshki ister mınıstrligi ata-analardy balalardy sý aıdyndarynyń mańynda qaraýsyz qaldyrmaýǵa shaqyrdy. Vedomstvo málimetinshe, shomylý maýsymy bastalǵaly beri elimizde 69 bala sýǵa batyp kóz jumǵan, dep habarlaıdy Polisia.kz.
ІІM dereginshe, qaıǵyly oqıǵalardyń basym bóligi shomylýǵa ruqsat etilmegen ári arnaıy jabdyqtalmaǵan oryndarda bolǵan.
– Shomylý maýsymy bastalǵaly beri elimizde 69 bala sýǵa batyp, kóz jumdy. Qaıǵyly oqıǵalardyń basym bóligi shomylýǵa ruqsat etilmegen jáne arnaıy jabdyqtalmaǵan jerlerde tirkeldi. Qaýipsizdik maqsatynda tek arnaıy jabdyqtalǵan jaǵajaılarda shomylyńyzdar, balalardy sý aıdyndarynyń mańynda qaraýsyz qaldyrmańyzdar jáne olarǵa beıtanys jerlerde shomylýdyń qaýipti ekenin túsindirińizder, – dedi ІІM Profılaktıkalyq jumysty úılestirý komıtetiniń tóraǵasy Arman Sadanov.
Mınıstrlik aptap ystyqtan keıin birden sýyq sýǵa túspeýge jáne sýdaǵy qaýipsizdik talaptaryn qatań saqtaýǵa shaqyrdy.
Sonymen qatar vedomstvo tyıym salynǵan oryndarda shomylǵany úshin ákimshilik jaýapkershilik qarastyrylǵanyn eske saldy. Jyl basynan beri osy quqyq buzýshylyq boıynsha 2 700-den astam adam jaýapqa tartylǵan.
– Qurmetti ata-analar, balalardyń qaýipsizdigi eń aldymen óz jaýapkershilikterińizde ekenin umytpańyzdar! – dep úndeý jasady Arman Sadanov.
Aıta keteıik, Ulttyq ulan ofıtseri sýǵa batyp bara jatqan balany qutqaryp qaldy.
