Sholpan Karınova: Ata-analar balalaryna qaı mamandyqty tańdaǵan durys ekenin túsindirýi kerek
NUR-SULTAN. QazAqparat – Tehnıkalyq, kásiptik jáne orta bilimnen keıingi bilim berý uıymdaryna stýdentterdi qabyldaý máselesine qatysty kolledj basshylary birneshe usynys bildirdi, dep habarlaıdy QazAqparat tilshisi.
«Tehnıkalyq jáne kásiptik kolledjderdiń basshylarynyń kóbi Bilim jáne ǵylym mınıstrligine negizgi úsh usynysty joldady. Keıbir áriptesterimiz kolledjge qabyldaý kezinde testileý júıesine aýysý kerektigin jetkizdi. Áriptesterimizdiń taǵy biri bul kolledjderge bıylǵy UBT-nyń ortasha baly boıynsha qabyldaý kerektigin másele etip kóterdi. Taǵy biri emtıhan qabyldaýdy burynǵy formatta qaldyrýdy usynýda. Shyndyǵy kerek, bul máselelerdiń kóterilip otyrǵanynyń ózi – qazirgi sanıtarlyq-epıdemıologııalyq jaǵdaıǵa baılanysty. Sondyqtan bárimiz de eń birinshi kezekte balalardyń densaýlyǵyna basa mán berýimiz kerek», - dedi QR Bilim jáne ǵylym vıtse-mınıstri Sholpan Karınova BǴM-niń onlaın baspasóz máslıhatynda.
Vıtse-mınıstr Prezıdenttiń Ulttyq qoǵamdyq senim keńesiniń otyrysynda Bilim jáne ǵylym mınıstrligi men jergilikti atqarýshy organdarǵa júktegen tapsyrmasyn eske saldy.
«Qazir Memleket basshysy jergilikti jerde tehnıkalyq jáne kásiptik bilim berý salasyna kóp kóńil aýdaryp, memlekettik tapsyrysty ulǵaıtý jóninde tapsyrma berdi. Osy oraıda az qamtylǵan otbasylardyń balalaryna, jetim jáne ata-anasynyń qamqorlyǵynsyz qalǵan balalardyń jaǵdaıyna nazar aýdarý kerektigin eskertti. Mınıstrlik tapsyrmany oryndaýǵa kiristi. Kolledjdermen osy mindetti oryndaý boıynsha josparlar bekitilip, jumysty atqarýǵa kirisip kettik», - dedi ol.
Sholpan Karınova osy rette tehnıkalyq jáne kásiptik kolledjderge akademııalyq derbestik berý – Elbasynyń mınıstrliktiń aldyna qoıǵan maqsaty ekenin tilge tıek etti.
«Prezıdent naqty kásiporyndarǵa qajetti mamandardy daıarlaýdy tapsyrdy. Bul birinshi eseppen kolledjderge stýdentterdi qabyldaýmen tikeleı baılanysty. Mańyzdysy – sapaly kadr. Bul rette kásibı baǵdardy aıqyndaý jumysy erekshe. Neǵurlym ata-analarǵa qaı mamandyq balasyna áleýetti, paıdaly ekenin túsindirý kerek. Prezıdenttiń qoıǵan mindetin oryndaýǵa atsalysýǵa shaqyramyn», - dedi kolledj basshylaryna Sholpan Karınova.
