Sholpan-Atadaǵy kezdesý Transkaspıı baǵytyn damytýǵa serpin beredi – sarapshy
ASTANA. KAZINFORM – Sholpan-Atadaǵy Konsýltatıvtik kezdesý aımaqtyq yntymaqtastyqtyń jańa kezeńimen tuspa-tus kelip, praktıkalyq máselelerdi talqylaý tetigine aınalyp otyr. Bul týraly QR Prezıdenti janyndaǵy Qazaqstannyń strategııalyq zertteýler ınstıtýty Azııalyq zertteýler bóliminiń jetekshi sarapshysy Baýyrjan Áýken aıtty.
Sarapshynyń aıtýynsha, qazirgi tańda bul format turaqty saıası dıalog alańynan praktıkalyq máselelerdi talqylaý jáne ortaq ustanymdardy úılestirý tetigine aınalyp otyr.
– Sholpan-Atada ótetin Ortalyq Azııa memleketteri basshylarynyń kezekti beıresmı Konsýltatıvtik kezdesýi aımaqtyq yntymaqtastyqtyń jańa serpin alǵan kezeńimen tuspa-tus kelip otyr. Qazirgi tańda format turaqty saıası dıalog alańynan praktıkalyq máselelerdi talqylaý jáne ortaq ustanymdardy úılestirý tetigine aınaldy. Ortalyq Azııadaǵy turaqtylyq pen yntymaqtastyqtyń nyǵaıýy Qazaqstannyń ekonomıkalyq damýy men uzaq merzimdi múddelerimen sáıkes keledi, - dedi ol.
Onyń sózinshe, bul úrdis ózara saýda kórsetkishterinen de aıqyn kórinis tabady.
– 2025 jyldyń qorytyndysy boıynsha Ortalyq Azııa memleketteri arasyndaǵy taýar aınalymy 12,3 mlrd dollardy qurady, al Qazaqstannyń aımaq elderimen saýda kólemi 8,8 mlrd dollarǵa jetti. Atalǵan kórsetkishter Qazaqstannyń aımaqishilik saýda men ekonomıkalyq yqpaldastyqtaǵy mańyzdy rólin kórsetedi. Qazaqstan aımaqtyq yntymaqtastyqty Ortalyq Azııanyń ornyqty damýyn qamtamasyz etetin uzaq merzimdi baǵyt retinde qarastyrady. Bul ustanym Qazaqstannyń usynysymen ázirlengen Aımaqtyq kooperatsııany damytý jónindegi «Ortalyq Azııa – 2040» tujyrymdamasynan kórinis taýyp otyr, - dedi Baýyrjan Áýken.
Sarapshy Ázerbaıjannyń Konsýltatıvtik kezdesýler formatyna qosylýy Ortalyq Azııanyń Kaspıı aımaǵymen jáne Ońtústik Kavkazben baılanysyn kúsheıtip, yntymaqtastyqtyń geoekonomıkalyq aýqymyn keńeıtetinin aıtty.
Spıkerdiń sózinshe, onyń praktıkalyq mańyzy Transkaspıı halyqaralyq kólik baǵytyn damytýǵa baılanysty.
– Atap aıtqanda, Qazaqstan men Ázerbaıjan osy baǵyttyń negizgi býyndarynyń biri. Qazaqstan arqyly Ortalyq Azııa men Qytaıdan keletin júkter Aqtaý jáne Quryq porttaryna jetkizilip, odan ári Ázerbaıjan arqyly Kavkaz, Túrkııa jáne Eýropa naryqtaryna shyǵady. Osylaısha, Ázerbaıjannyń formatqa qosylýy Transkaspıı baǵytyn ekijaqty joba sheńberinen keń aımaqtyq kólik júıesiniń quramdas bóligine aınaldyrady. Bul Ortalyq Azııa memleketterine syrtqy naryqtarǵa shyǵý baǵyttaryn ártaraptandyrýǵa, al Ázerbaıjanǵa aımaqpen kóliktik jáne saýda baılanystaryn keńeıtýge múmkindik beredi, – dedi ol.
Baýyrjan Áýkenniń aıtýynsha, osy turǵydan alǵanda, Sholpan-Atadaǵy kezdesý aımaqtyq dıalogtyń saıası konsýltatsııalardan naqty ekonomıkalyq jáne ınfraqurylymdyq mindetterdi sheshýge baǵyttalǵan jańa kezeńge ótip kele jatqanyn kórsetedi.
Eske salaıyq, Ázerbaıjan Ortalyq Azııa basshylary Konsýltatıvtik kezdesýiniń teń quqyly múshesi atanǵan edi.
