Sholpan Ata qalasynda І Búkilálemdik kóshpendiler oıyndary ashyldy
ASTANA. QazAqparat - 9 qyrkúıek kúni Qyrǵyzstannyń Sholpan Ata qalasynda І Búkilálemdik kóshpendiler oıyndarynyń ashylý saltanaty ótti.
Biregeı sport jarysynyń qatysýshylaryna Qazaqstan Prezıdenti N.Á.Nazarbaev quttyqtaý hatyn joldady, dep habarlaıdy QR Mádenıet jáne sport mınıstrliginen.
Qazaqstan Prezıdentiniń quttyqtaýynda «Birinshi Búkilálemdik kóshpendiler oıyndary - kóshpendi halyqtyń rýhanı qundylyqtaryn saqtaýǵa baǵyttalǵan taǵy bir múmkindik. Sizder óz halyqtaryńyzdyń tarıhı-mádenı murasyn súıetin mádenıet salasynyń jarqyn ókilisizder. Osyndaı is-sharalar túrki álemi halyqtarynyń basyn biriktiredi, genetıkalyq kodtyń jandanýyna sep bolyp, tarıhı sanany qalyptastyrady», delingen.
«І Búkilálemdik kóshpendiler oıyndary mádenıetaralyq dıalogty qamtamasyz etý boıynsha memleketter ıntegratsııasy jolynda jasalǵan taǵy bir qadam ári elderimizdiń baı murasyn nasıhattaýǵa qosar úles bolmaq», - dep atap ótti N.Á.Nazarbaev.
Búkilálemdik oıyndardyń maqsaty - aımaqtaǵy kórshilik qarym-qatynastardy, túrkitildes elderdiń aýyzbirligin nyǵaıtý, kóshpendi elder mádenıetiniń uqsastyǵy men babalar murasyn saqtap qalý ıdeıasyn damytýǵa jańa serpin berý.
Qazaqstannyń resmı delegatsııasyn Qazaqstan Respýblıkasynyń Mádenıet jáne sport mınıstri Arystanbek Muhamedıuly jáne Qazaqstan Respýblıkasynyń Qyrǵyz Respýblıkasyndaǵy Tótenshe jáne Ókiletti Elshisi Beıbit Isabaev bastap bardy.
Buryndary habarlanǵandaı, jarysqa Túrkııa, Qazaqstan, Ózbekstan, Tájikstan, Túrkimenstan, Gagaýzııa, Ázerbaıjan, Mońǵolııa, Reseı, Qytaı elderiniń sport delegatsııalary qatysady. Qazaqstannyń sport delegatsııasynyń quramyna ulttyq sport túrleri boıynsha jetistikterge jetip júrgen sportshylar endi.
Oıyndar baǵdarlamasynda asyq atý, toǵyzqumalaq, qazaq kúresi, qyrǵyz kúresi, alysh, kókpar, aýdaryspaq, alaman báıge, qunan báıge, at jarysy qamtylǵan. Saıystyń saltanatty jabylý rásimi Sholpan Atada 14 qyrkúıek kúni 3D formatynda ótedi.
